音拍

音拍（粵音：jam1 paak3；英文：mora；亦可以睇梵文：मात्रा / mātrā），香港語言學學會譯做莫拉^{[註 1]}，係音系學上講到嘅概念。一段音拍係理論或者感知上最細時間單位，如果要用音拍嚟分析一隻語言嘅話，研究者會將隻語言嘅語音想像成係由一段段音拍組成，每段音拍時間長度相同或者大致相同，每段音拍包含嘅可以係成段音節（元音加輔音）亦可以係（例如）單丁一個輔音。

例如廿一世紀初嘅日語，就成日會用音拍嘅概念嚟分析：好似係字詞おoおoさsaかka（指大阪，近似粵音：o6 o1 saa3 kaa4）噉；根據主流分析，呢隻字詞有三截音節－ oo-sa-ka，但係音拍就有四截－ o-o-sa-ka，當中每段音拍時間長度相約，而一段音拍可以成一段音節但係一段音節亦可以橫跨多段音拍。順帶一提，日文書寫用嘅假名被指係一種音拍型嘅文字，每段符號反映一段音拍。

除咗日語之外，古希臘文^[1]、梵文同埋古英文，都有人會用音拍概念嚟分析。

組成

内文：音節、等時同語言韻律

音拍係計時嘅單位。講嘢嗰陣每一段音拍都差唔多一樣咁長。^[2]

一般嚟講，用音拍剖析語音嗰陣通常^{[註 2]}要跟從以下嘅法則^[3][4]：

1. 音節首（段音節嘅開頭輔音）唔可以自成一段音拍。
2. 音節核對應幾多段音拍，就要視乎個元音係長定短。假如元音係短嘅，音節核就對應一段音拍，而假如元音係長或者有雙元音，噉音節核就對應兩段音拍。如果音節核係輔音，道理相同。
3. 喺某啲語言入便，音節尾可以自成一段音拍，例如日語同拉丁文都被指有噉嘅情況。

有關音拍嘅特性，唔同語言可以好唔同。喺某啲語言入便，一段音節可以橫跨三至四段音拍咁多：一段音節可能以一個長元音或者雙元音做核（兩段音拍）而且加上若干個輔音做音節尾（又掗多一段音拍），例如梵文就有噉嘅情況；而廿一世紀初嘅學者研究古英文（超過 1,000 年前嘅英文）指出古英文以及某啲當代嘅英文方言，可以一段音節橫跨四段音拍咁多^[5]。

亦有部份語言可能唔需要音拍嘅概念：有啲語言係音節定時嘅^[6]，即係每段音節喺時間上大致都係一樣咁長，所以對佢哋嚟講，音節同音拍係同一樣嘢，分析佢哋嗰時唔需要用音拍嘅概念。

日語

睇埋：假名同俳句

喺廿一世紀初，學者成日都會用音拍（日文寫作モmoーラra）呢個概念嚟分析日本話嘅多數方言，有一種常見嘅諗法係，日本話語音嘅基本單位係音拍而非音節。例如以下呢幾隻日語字詞噉：

用日羅表達	慣常寫法	意思	音拍量	音節量
Nihon	にほん / 日本	日本	三：ni-ho-n	二：ni-hon
Tōkyō	とうきょう / 東京	東京	四：to-u-kyo-u [註 3]	二：tou-kyou [註 4]
Taberu	たべる / 食べる	食...	三：ta-be-ru	三：ta-be-ru

日文書寫用嘅假名，被指係音拍型^[7]嘅文字^[8]:4.1.2，多數字符都係每隻表示緊一段音拍，一係寫緊開頭輔音加個元音（例如かけこka ke ko）或者冇開頭輔音嘅元音，一係就寫緊音節輔音 n ^{[註 5]}。拗音係少數嘅例外。拗音包括一個輔音後面掕一個（用國際音標寫）/j/ 噉嘅音，用日羅寫即係 ky- 或者 gy- 噉樣開頭嘅音節。喺書寫上，呢啲語音慣例係用細嘅 ゃ-ya ゅ-yu ょ-yo 嚟表達，會寫做例如きょkyo- 噉嘅樣。

睇埋

• 音系
• 音長
• 高低重音
• 音節文字
• 音樂拍子

註釋

1. 譯名見：LSHK 雙語術語對照表
2. 語言呢家嘢梗會有啲混沌，好少可有法則係永遠成立嘅。
3. 喺現代日語好多時實際上係 to-o-kyo-o
4. 喺現代日語好多時實際上係 tō-kyō
5. 日語嘅音節輔音 n 唔似英文嘅結尾輔音 -n，反而係好似粵語咁，可以喺任何位置出現，包括獨立出現（ん，n，感歎詞^[9]）、開頭（んま，mma，馬，方言^[10]）等等；好多文法上常用嘅嘢其實亦都係音節輔音 n 開頭，例如極常見嘅んだ（のです）。