輔音

輔音（粵拼：fu6 jam1），又叫子音，係種音素，同元音（母音）相對。具體定義係：「發音器官某一部份形成阻礙，令到伊部份有一定程度嘅緊張，並由較強氣流克服障礙形成嘅語音」^[1]。子音分類通常有三套標準：一、發音（又叫調音）位置（又叫部位）；二、發音方式；三、聲帶振唔振動。

通常音節要有元音做音節核，但某啲輔音喺部份語言都可以做音節核。

以下嘅內容會用到國際音標同粵拼嚟精確噉表達語音。

基礎概念

内文：語音學同固有音響

以下係廿一世紀初嘅粵語音系裡邊嘅輔音^[2]，用粵拼寫。每隻音會掕返隻「以呢款輔音開頭嘅漢字」^{[註 1]}：

		唇音	脷尖前音 / 脷尖中音		硬顎音	軟齶音		喉音
			非噝音	噝音		單輔音	唇音化
鼻音[註 2]		m 媽	n 泥			ng 我
塞音	唔送氣	b 巴	d 端	z 精		g 加	gw 瓜	(ʔ) 亞
	送氣版本	p 趴	t 他	c 清		k 卡	kw 誇
擦音		f 花		s 沙				h 哈
近音			l 啦		j 伊		w 蛙

分類方法

睇埋：調音部位同調音方法

啲人要將輔音分類嗰陣時，正常嚟講都係按調音部位同調音方法嚟分嘅：用粵語入便有嘅音做例子嘅話，

• 例如雙唇鼻音（想像粵拼：maa1）/m/ 同齒齦鼻音（想像粵拼：naa1）/n/ 兩者都係鼻音，都涉及軟腭下垂（相同調音方法），但係調音部位唔同—/m/ 用晒兩塊嘴唇嚟發音，而 /n/ 就係用到脷尖；
• 又或者可以想像吓 /m/ 同 /p/（想像粵拼：baa1）之間嘅差異，兩者嘅調音部位相同，都係用兩塊嘴唇嚟發音嘅，但係調音方法就唔同—/p/ 涉及嘅係聲道空氣流動受阻。

語言比較

睇埋：音系類型

唔同語言嘅輔音特性可以幾唔同。廿一世紀初嘅粵語有19隻輔音^{[註 3][3]}，英文有23隻，河內越南話有20隻^[4]－都算係接近平均嘅輔音數量；世上有啲語言得6隻咁少，又有啲語言有成百幾隻咁多。

「有冇呢隻呢隻常見嘅音」都可以攞嚟比較：例如/f/係好常見嘅輔音，據估計49%嘅語言都有佢；喺廿一世紀初嘅世界，由英文至法文、粵語至客家話至標準官話至日本話都有/f/，但韓國話就無^[5]。

唔同語言喺複輔音相關特性上可以爭幾遠：每隻語言都會有一啲輔音組合法則，淨係准許某啲輔音組合。例如

• 用廿一世紀初嘅粵語，讀食呢隻漢字，呢個讀音用粵拼嚟寫係 sik6 而用 IPA 寫就係 /siːk̚˨/，成段音節並冇任何複輔音——音節嘅開頭輔音係單丁嘅 /s/ 而結尾輔音係單丁嘅 /k̚/，兩個都係單獨嘅輔音。
• 例如廿一世紀初嘅英文字詞 twelfth 噉——呢隻字詞讀音（用 IPA 寫）係 /twɛlfθ/，意思係第十二個噉解，開頭嗰度有兩個輔音 /tw/ 而埋尾嗰度有三個輔音 /lfθ/，係一隻有複輔音嘅字詞。

睇埋

• 音節輔音
• 輔音群

註釋

1. 文字往往唔能夠完美反映語音，例如粵拼 oe1（鋸係粵拼：goe3）個音唔係真係 o1 同 e1 嘅結合，而係自成一個輔音，不過羅馬字母唔夠字母用，唯有將 oe 寫做 o 同 e 呢兩隻字母嘅結合。
2. 喺廿一世紀初嘅粵語日常語音當中，啲人成日都唔分 n 同 l，又唔分 ng 同埋冇開頭輔音嘅音。
3. 根據某啲數法，廿一世紀初嘅粵語有20隻。