黎明行動

  呢篇文講廣義嘅「黎明行動」。想搵狹義嘅「黎明行動」嘅話，請睇雙十一三罷。

黎明行動廣義上係指香港由2019年11月11號到11月22號逢禮拜一到五朝早搞嘅反逃犯條例修訂運動嘅示威行動嘅統稱，形式包括「三罷」（罷工、罷課、罷市）同埋針對交通嘅唔合作運動。而「黎明行動」本身同時亦係2019年11月11號嗰日嘅行動代號（即係「雙十一三罷」）。

「黎明行動」嘅活動包括整路障

黎明行動逢禮拜一到五輪流用一個行動代號，分別係「黎明」、「破曉」、「晨曦」、「曙光」、「旭日」，五個代號意思都同日出有關，同包含咗日字部嘅字。第二個禮拜就加「2.0」字眼識別。

黎明行動早期強調係「三罷」，不過絕大部份人好難長期罷工，所以實際上都係以阻礙交通為主，效果以第一個禮拜比較明顯，到第二個禮拜隨住吐露港公路同東鐵線恢復通車，雖然紅磡海底隧道未通返車，但效果已經明顯唔及第一個禮拜。加上中大同理大衝突之後，示威者勢力元氣大傷，活動亦越嚟越少人參與，踏入第三個禮拜就無再繼續話要搞。

各日行動

日子	行動代號	備註
11月11號	黎明行動
11月12號	破曉行動
11月13號	晨曦行動
11月14號	曙光行動	中小學嗰日停課
11月15號	旭日行動	中小學嗰日停課
11月18號	黎明行動2.0	嗰日焦點落入香港理工大學衝突，所以實際上無活動； 中小學嗰日停課
11月19號	破曉行動2.0	嗰日焦點落入香港理工大學衝突，所以實際上無活動； 中小學嗰日停課
11月20號	晨曦行動2.0
11月21號	曙光行動2.0
11月22號	旭日行動2.0

睇埋

• 香港中文大學衝突
• 香港理工大學衝突