反逃犯條例修訂運動

反逃犯條例修訂運動（英文：Anti-Extradition Law Amendment Bill Movement），簡稱反修例運動（英文：Anti-ELAB Movement），支持者又叫反送中運動，個別傳媒叫香港修例風波、逆權運動、抗暴之戰^{[註 2]}、黑色暴亂^{[註 3]}、己亥事變^{[註 4]}、香港憲法保衛戰或香港護法運動^{[註 5][4]}，係香港2019年3月15號開始、6月9號大規模爆發嘅一連串反對逃犯條例修訂草案嘅社會運動，形式包括和平嘅遊行同集會，之後亦有出現激進嘅圍堵同衝擊行動。

反逃犯條例修訂運動
逃犯條例修訂草案同中港矛盾嘅一部分
日期 成場運動： 2019年3月15號開始 大規模爆發： 2019年6月9號 (2019-06-09)[1]— 2020年1月19號 (2020-01-19)（225日）[註 1] 地點 主要係香港，亦有世界各地幾十個城市 起因 香港政府喺普遍民意反對嘅情況下強行推動逃犯條例修訂草案立法 警方使用過量武力對待示威者 社會對中港矛盾、香港政府施政表現差劣同唔民主政制一路積壓嘅怨氣 雨遮革命嘅失敗[2] 目標 令香港政府接納以「徹底撤回《逃犯條例》修訂」為首嘅「五大訴求」 特徵 遊行、集會、唔合作運動等 結果 示威者一方失敗，換嚟中央同香港政府加強對香港嘅管制： 雖然香港政府喺2019年10月23號正式撤回《逃犯條例》修訂，但無應承其餘訴求。 自2020年2月開始，香港政府用「武肺疫情」做理由，唔再為示威活動發出「不反對通知書」。 全國人大喺2020年6月30號正式通過《香港國家安全法》，用嚟制止同反修例相關嘅示威同抗爭活動。 全國人大喺2021年3月11號正式通過「311決定」，同年5月27號由立法會通過《完善選舉制度條例草案》，大幅削減香港議會嘅西方民主成份。 香港政府喺2021年6月下旬用《香港國家安全法》做理由凍結力撐逆權運動嘅龍頭傳媒壹傳媒嘅資產，令佢旗下嘅《蘋果日報》等刊物因為無資金週轉而被逼停刊。 香港政府喺2021年9月展開區議員宣誓儀式，對支持過反修例嘅區議員進行清算；2023年7月通過完善地區治理建議方案，大幅削減區議會嘅民選成份。
衝突方
示威者 無統一組織，嚟自社會各界，後生仔比例高啲 主要支持組織 民間人權陣線 泛民主派組織 本土派、抗爭派組織 香港大專院校各個學生會	香港政府 行政會議 律政司 保安局 警務處 主要支持組織 建制派組織 守護香港大聯盟 黑社會組織 民主思路 中華人民共和國政府 國務院港澳辦 香港中聯辦 國防部 公安部
指揮人士
示威者 無統一領導	香港政府 林鄭月娥 張建宗 鄭若驊 李家超 盧偉聰 鄧炳強 中華人民共和國政府 習近平 韓正 張曉明 王志民 駱惠寧

雖則香港政府自6月中已經停止咗修例工作，但要到9月初先至宣佈正式撤回修訂，加上未能滿足運動入面提出嘅其餘訴求，呢場運動未有好快完結。隨住2020年頭香港爆發疫情，同埋6月底政府推行由全國人大通過嘅《香港國家安全法》，反修例相關嘅示威同抗爭活動就被壓制咗落嚟。

呢次運動唔單止係香港自六七暴動、九七回歸以嚟最大規模嘅社會動盪，更加畀國際社會高度關注。

歷史

呢場運動源自2018年香港女子臺灣遇害案嘅疑兇陳同佳喺現有制度下唔可以引渡返臺灣受審，香港政府就喺2019年2月提出逃犯條例修訂草案，畀香港將疑犯引渡到任何未同香港有引渡協議嘅地方，包括中華人民共和國、澳門、台灣等地。不過呢個修訂令香港政府可以將種種「逃犯」運去中華人民共和國度，而好多人都對渠套司法制度冇信心，又擔心呢個安排會侵蝕香港「一國兩制」嘅根基，所以強烈反對修例；抗議者並唔係反對將疑犯引渡去陳同佳殺潘曉穎案嘅事發地，台灣去審訊。反對者又將「被引渡返中國受審」嘅憂慮叫做「送中」，同「送終」諧音^[5]。

香港眾志喺3月15號搞嘅靜坐，係頭一個反修例嘅示威活動，之後社會各界亦以唔同方式表達反修例嘅訴求，但政府一路都企硬，聲稱修例係要「填補法律缺陷」，堅持安排喺立法會夏季休會前完成審議，結果引起更大規模嘅示威活動，6月9號民陣搞嘅反送中大遊行號稱有過百萬人參加，當局依然無動於衷，結果6月12號嘅示威演化成警民衝突，防暴警察被指使用過量武力，而政府曾一度話呢次衝突係「暴動」，引發更多民怨。行政長官林鄭月娥喺6月15號宣佈暫緩修訂草案，意圖令局勢降溫，但佢一路拒絕用「撤回」嘅字眼，大多數示威者都唔收貨，令運動規模逐漸擴大，「遍地開花」到香港各區，每個禮拜都有唔同區份搞示威活動，多數都出現激進示威者同警方對峙同嘅衝突情況。當局去到9月4號先至宣佈正式撤回修例，但仍然無回應其餘訴求，所以仍然未平息到民怨。到10月頭，政府引用《緊急情況規例條例》去訂立《禁止蒙面規例》，希望可以減少激進示威行為，但見唔到成效。

2020年初，由於肺炎疫情嘅關係，反修例運動嘅氣氛曾經緩和咗一段時間，取而代之嘅就係一連串反肺炎診所遊行同零星嘅聚集活動，但係示威者並冇放棄初衷，持續抗爭。同年5月開始，隨住疫情穩定，加埋港府推動《國歌法》本地立法同埋中央人民政府對香港頒布「香港國家安全法」，反修例運動嘅氣氛一度加強返。到同年8月8號，香港政府回應美國政府推行《香港自治法案》作出對香港嘅制裁嗰陣，首度將反修例運動定性做「反政府動亂」^[6]。

五大訴求

呢場運動當初爭取嘅係要求當局撤回《逃犯條例》修訂，隨住時局發展，支持者加入更多訴求，逐漸發展出獲運動參與者廣泛認可嘅「五大訴求」：

	訴求內容	政府官方回應	狀態
1	徹底撤回《逃犯條例》修訂	行政長官林鄭月娥喺6月15號宣佈暫緩條例草案。佢再喺9月4號宣佈會正式撤回條例草案 —— 保安局局長會喺立法會10月復會後，按《議事規則》提出撤回條例草案。但係人大喺6月通過咗香港國安法，可以將疑犯送去中國審判[7]。	Y 10月23號落實咗 N喺國安法之下，可以將疑犯送去中國審判。
2	收回對6月12號同其後抗議活動嘅「暴動」定性	政府話法律程序上唔存在「暴動定性」，又話每單案嘅刑事檢控決定，都係按證據、法律同《檢控守則》作出嘅。	N 唔接納
3	撤銷所有抗爭者嘅控罪	政府認為呢啲要求係法治社會所接受唔到嘅，又話根據《基本法》，律政司嘅刑事檢控決定必須唔受任何干涉，若果唔係就會違反咗香港嘅法治精神。	N 唔接納
4	成立「獨立調查委員會」[註 6]，追究警隊濫權	政府認為警方執法行動應該按既定機制，交由專責嘅獨立監察警方處理投訴委員會（監警會）處理，而唔應該另設獨立調查委員會。監警會亦正按照佢嘅法定職權，詳細審視由6月9號開始發生嘅一連串大型公眾活動，目標係重組事實，評估警方嘅處理，同埋提出改善建議。	N 唔接納
5	全面落實雙「真普選」[註 7]	政府認為社會需要喺法理嘅基礎上，同埋喺平和、互信嘅氛圍下，用務實嘅態度進行討論，若果唔係只會令社會更加撕裂。	N 唔接納

另外，10月頭有啲示威者分別想將「解散警隊」同「停止引用緊急法同撤回禁蒙面法」加入做第六個訴求，夾埋叫「六大訴求」，不過多數示威者認為應該要專注返原先嘅「五大訴求」，所以「六大訴求」嘅叫法唔成氣候。

抗爭特色

呢場運動由民間自發，無大台指揮，參與者主要都係透過LIHKG（連登）討論區同通訊軟件Telegram交流。參與者通常可以分做兩類：多數都係參與和平合法示威活動嘅「和理非」（和平、理性、非暴力），亦有啲人係參與前線激進抗爭嘅「勇武派」，雙方一般都同意下面嘅原則：

• 「唔流血，唔受傷，唔被捕」：告誡「勇武」要避免流血衝突，唔好受傷同唔好畀差人拉。
• 「唔分化，唔篤灰，唔割蓆」：告誡「和理非」就算唔認同「勇武」嘅激進手段，都要包容佢哋嘅行為，唔好內鬨。
• 「兄弟爬山，各自努力」：「和理非」同「勇武」可以用返各自嘅手段，去達致同一個目標。
• 「Be Water」：出自武打巨星李小龍嘅名言，告誡抗爭嗰陣要好似水噉樣識得靈活走位，唔好死守同一笪地方。

抗議活動

主要遊行

註：＃ 活動被警方發「反對通知書」；＊ 活動無向警方申請「不反對通知書」

民間人權陣線主辦

• 反對修訂引渡條例遊行（2019年3月31號）
• 撤回修訂引渡條例遊行（2019年4月28號）
• 反送中大遊行（2019年6月9號）
• 譴責鎮壓撤回惡法大遊行（2019年6月16號）
• 2019年七一遊行（2019年7月1號）
• 七二一遊行（2019年7月21號）
• 煞停警黑亂港落實五大訴求集會（原「煞停警黑亂港落實五大訴求遊行」）（2019年8月18號）＃
• 國際人權日遊行（2019年12月8號）
• 2020年元旦大遊行（2020年1月1號）

其他遊行（包括被警方發「反對通知書」嘅自發遊行）

• 七七九龍區大遊行（2019年7月7號）
• 七一四沙田區大遊行（2019年7月14號）
• 光復元朗反對黑勢力示威（原「光復元朗反對黑勢力遊行」）（2019年7月27號）＃
• 上環追究開槍集會（原「上環追究開槍遊行」）（2019年7月28號）＃
• 旺角再遊行（2019年8月3號）
• 八四將軍澳大遊行（2019年8月4號）
• 八四港島西集會（原「八四港島西遊行」）（2019年8月4號）＃
• 八一零大埔示威（原「八一零大埔遊行」）（2019年8月10號）＃
• 八一一深水埗示威（原「八一一深水埗遊行」）（2019年8月11號）＃
• 八一一港島東集會（原「八一一港島東遊行」）（2019年8月11號）＃
• 燃點香港全民覺醒遊行（2019年8月24號）
• 八二五荃葵青遊行（2019年8月25號）
• 人大八三一五周年示威（原「人大八三一五周年遊行」）（2019年8月31號）＃
• 天水圍親子示威（原「天水圍親子遊行」）（2019年9月14號）＃
• 五大訴求缺一不可示威（原「五大訴求缺一不可遊行」）（2019年9月15號）＃
• 全球反極權大遊行（2019年9月29號）＊
• 沒有國慶只有國殤遊行（2019年10月1號）＃
• 反極權反緊急法大遊行（2019年10月6號）＊
• 尖沙嘴反緊急法遊行（2019年10月12號）＊
• 廢除惡法獨立調查重組警隊大遊行（2019年10月20號）＃
• 感謝美國保護香港大遊行（2019年12月1號）
• 毋忘初心大遊行（2019年12月1號）

主要集會同和平活動

註：＃ 活動被警方發「反對通知書」；＊ 活動無向警方申請「不反對通知書」

• G20 Free Hong Kong集會（2019年6月26號）
• 和你飛集會（2019年7月26號）
• 公僕仝人與民同行集會（2019年8月2號）
• 萬人接機行動（2019年8月9-11號）＊
• 百萬人塞爆機場行動（2019年8月12號）＊
• 英美港盟主權在民集會（2019年8月16號）
• 香港之路（2019年8月23號）＊
• 反送中＃MeToo集會（2019年8月28號）
• 反濫捕抗威權集會（2019年9月6號）
• 香港人權與民主祈禱會（2019年9月8號）
• 反抗威權迎接黎明集會（2019年9月28號）
• 香港人權民主法案集氣大會（2019年10月14號）
• 香港加泰人權自由集會（2019年10月24號）
• 醫護抗暴集會（2019年10月26號）
• 追究警暴集會（2019年10月27號）＊
• 求援國際堅守自治集會（2019年11月2號）＃
• 主佑義士全港祈禱及集氣大會（2019年11月9號）
• 願祢榮光歸香港集會（2019年11月17號）
• 東歐巨變三十周年集會（2019年11月17號）
• 香港人權與民主法案感恩節集會（2019年11月28號）
• 吸吸可危集會（2019年12月6號）
• 齊上齊落612半週年紀念集會（2019年12月12號）
• 星火不息燃點國際集會（2019年12月23號）
• 香港人抗爭的日與夜集會（2019年12月29號）
• 團結護專業抗白色恐怖教育界集會（2020年1月3號）
• 天下制裁集氣大會（2020年1月12號）
• 天下制裁集會（2020年1月19號）

主要包圍同衝擊行動

• 反送中包圍立法會（2019年6月12號）
• 大專學界反送中升級行動（2019年6月21號）
• 佔領立法會（2019年7月1號）
• 九一機場和你塞行動（2019年9月1號）
• 九七機場和你塞行動（2019年9月7號）
• 九二二機場和你塞行動（2019年9月22號）
• 香港中文大學衝突（2019年11月11號—15號）
• 香港理工大學衝突（2019年11月11號—29號）

罷工同唔合作運動

• 八五三罷（2019年8月5號）
• 雙十一三罷（2019年11月11號）
• 黎明行動（2019年11月11號—22號）

其他形式嘅抗議活動

• 窗邊咆哮（2019年8月中開始每晚10點，但到9月中下旬之後已經少人參與）
• 商場大合唱 / 和你唱 （2019年9月搞過多次，之後因為武漢肺炎沉寂落嚟，到2020年4月底出現返）
• 黑裝修，紅裝飾，藍罷買，黃幫襯 （2019年10月頭開始，11月中旬之後逐漸得返「藍罷買，黃幫襯」維持到）
• 和你Lunch（2019年11月12號開始用呢個名搞，之前亦有類似形式嘅活動）

常用抗議口號

每次示威活動，群眾都會嗌下面嘅口號，帶頭人先嗌上半句，其他人接埋下半句。

基本口號

口號	粵拼	背景同意義
「五大訴求，缺一不可」	ng5 daai6 sou3 kau4 kyut3 jat1 bat1 ho2	呢個口號講出咗呢場抗爭運動嘅主要目標，就係要求香港政府妥善回應「五大訴求」。
「Five demands, not one less.」	唔適用
「光復香港，時代革命」	gwong1 fuk6 hoeng1 gong2 si4 doi6 gaak3 ming6	呢個口號最初由香港本土派人士梁天琦喺參選2016年立法會補選嗰陣提出，希望各個世代嘅香港人可以參與革新，令香港變得更好。呢場抗爭運動入面，呢個口號再被廣泛採用。但係建制觀點認為呢個口號係變相鼓吹港獨。
「沒有暴徒，祇有暴政」	mut6 jau5 bou6 tou4 zi2 jau5 bou6 zing3	呢個口號最初由運動期間佔領立法會嘅示威者提出，表達出示威者嘅激進行為完全都係因為香港政府嘅「暴政」激發出嚟。
「香港人，加油」 （10月4號前流行）	hoeng1 gong2 jan4 gaa1 jau2	呢個口號係幫香港人打氣，意思比較溫和。
「香港人，反抗」 （10月4號到11月8號流行）	hoeng1 gong2 jan4 faan2 kong3	10月4號，政府宣佈引用緊急法去推行禁蒙面法，示威者認為香港人應該要一齊企出嚟反抗，所以取代咗原先「香港人，加油」嘅口號。
「香港人，報仇」 （11月8號開始流行）	hoeng1 gong2 jan4 bou3 sau4	11月8號，懷疑因避開警方催淚彈而墮樓嘅學生周梓樂宣告不治，示威者認為警方要為周嘅死負責，需要為周報仇，所以取代咗原先「香港人，反抗」嘅口號。
「香港人，戰鬥」 （2020年1月2號開始流行）	hoeng1 gong2 jan4 zin3 dau3	2020年元旦大遊行，民陣聲稱有103萬人參加遊行，入夜之後差佬拘捕400人，蘋果日報更以呢句話做咗1月2號嘅A1頭條標題。
「Fight For Freedom. Stand With Hong Kong.」	唔適用	呢個英文口號意思係「同香港一齊爭取自由」，主要對象係國際社會。

針對警察嘅口號

口號	粵拼	背景同意義
「香港警察，知法犯法」[註 8]	hoeng1 gong2 ging2 caat3 zi1 faat3 faan6 faat3	呢個口號係譴責香港警察濫用咗過份嘅暴力去對待示威者。七二一元朗襲擊後，呢個口號亦譴責埋香港警察涉嫌包庇黑社會勢力。
「黑社會」	hak1 se5 wui2	呢個口號針對香港警察喺7月21號晚同圍村手持棍棒鐵通嘅白衫「齊上齊落」，無拘捕執棍棒白衫，亦無處理白衫毆打示威者嘅案件。坊間認為呢件事係警黑勾結，將香港警察叫做黑社會。
「黑警，死全家」	hak1 ging2 sei2 cyun4 gaa1	呢個口號係鬧警察係「黑警」，當中第二句出現過唔同版本： 運動初期比較常用嘅版本係「可恥」（ho2 ci2）； 到8月11號示威活動嗰晚有位女義務救護員畀警方嘅布袋彈打傷右眼，就變成「還眼」（waan4 ngaan5）； 到9月爆眼嗰件事逐漸丟淡之後，再逐漸演變成而家嘅「死全家」。
「七二一，唔見人； 八三一，打死人[註 9] ； 十月一，槍殺人」	cat1 ji6 jat1 m4 gin3 jan4 baat3 saam1 jat1 daa2 sei2 jan4 sap6 jyut6 jat1 coeng1 saat3 jan4	呢個口號喺9月頭出現，初頭得兩句：第一句針對7月21號元朗襲擊嗰陣，警察遲遲唔出現；第二句針對8月31號就有警察喺太子站毆打市民。 10月頭加入咗第三句，針對10月1號有警察開槍爭啲打死一位示威者。
「好仔唔當差，當差正仆街」	hou2 zai2 m4 dong1 caa1 dong1 caa1 zing3 puk1 gaai1	呢個口號改編自傳統俗語「好仔唔當差」。
「解散警隊，刻不容緩」	gaai2 saan3 ging2 deoi6 hak1 bat1 jung4 wun6	有啲示威者認為警方濫暴嘅問題要解散成個警隊先至解決到。
「強姦犯，殺人犯」	koeng4 gaan1 faan2 saat3 jan4 faan2	呢個口號指控警察涉及強姦同殺人嘅罪行，包括11月頭傳出有警察涉嫌喺荃灣警署強姦16歲女被捕人士，同埋之前多次警民衝突入面都有警察做出意圖謀殺示威者嘅行為。[8]
「愛比暴力強，與警暴割席」	oi3 bei2 bou6 lik6 koeng4 jyu5 ging2 bou6 got3 zek6	呢個口號改編自香港政府2019年11月推出嘅宣傳片口號「愛比暴力強，與暴力割席」。

針對禁蒙面法嘅口號

口號	粵拼	背景同意義
「我有權，戴口罩」	ngo5 jau5 kyun4 daai3 hau2 zaau3	呢啲口號都係抗議政府喺10月4號宣佈引用緊急法去推行禁蒙面法。
「蒙面無罪，立法無理」	mung4 min6 mou4 zeoi6 lap6 faat3 mou4 lei5

國際反應

睇埋：各國對中國威脅對應措施一覽

8月底，第45屆七大工業國組織會議喺法國舉行。峰會發表聯合聲明，強調G7再次肯定給予香港一國兩制下自治嘅1984年《中英聯合聲明》嘅存在同重要性，敦促中國信守承諾維持香港自治。G7份聯合聲明重呼籲避免暴力。

英國首相約翰遜表示，七國集團首腦對香港局勢深表關注，都支持一個穩定而繁榮嘅香港，並繼續致力於一國兩制框架。

8月27號，中國外交部發言人耿爽喺例行記者會話，《中英聯合聲明》終極目的係確定中國收回香港，任何國家組織無權假借《中英聯合聲明》干涉香港事務，七國集團首腦會議領導人發表聲明，對香港事務「說三道四、指手畫腳」，中方表示強烈不滿、堅決反對^[9]。

9月25號，美國參眾兩院嘅外交委員會分別通過咗《香港人權與民主法案》。經過參眾兩院審議同表決，總統當勞侵喺11月27號簽署法案，正式生效。

相關創作

• 香港連儂牆 (第二代)
• 《願榮光歸香港》
• 《肥媽有話兒》

睇埋

• 反逃犯條例修訂運動術語一覽
• 雨遮革命

註

1. 自2020年1月19號嘅天下制裁集會之後，就再未有出現過用反修例同「五大訴求」做主題嘅大規模嘅示威同抗爭活動。
2. 「逆權運動」由壹傳媒旗下媒體（主要係《蘋果日報》）喺7月8號開始用，理據係呢場運動已經超出咗反逃犯條例修訂，到10月4號禁蒙面法推出後改用「抗暴之戰」，但呢兩個稱呼暫時都未算流行。
3. 「黑色暴亂」有時又叫做「黑暴之亂」，主要係親中派媒體文匯報、大公報、東方日報對反修例運動常用嘅稱呼。
4. 「己亥事變」本來係黃毓民喺東方日報嘅「擊楫中流」專欄其中一篇文章標題^[3]，其後亦逐漸成為普羅政治學苑對反修例運動嘅稱呼，但呢個稱呼暫時都未算流行。
5. 呢個係修憲派陳雲（陳云根）用語。
6. 早期第四個訴求無提到要有「獨立調查委員會」，後嚟先至出現。
7. 早期第五個訴求係「要求行政長官林鄭月娥落台」，後嚟運動參與者普遍認為改革政制先至治本，所以改由「真普選」取代。
8. 後期開始有「香港警察，吞槍自殺」、「香港警察，強姦謀殺」等等嘅變體
9. 8月31號太子站有無死過人有爭議，另一版本就將「打死人」轉做「打市民」（daa2 si5 man4），不過後尾喺未證實有死過人嘅情況下，多數人都仍然照嗌「打死人」嘅版本。