![cover image](https://wikiwandv2-19431.kxcdn.com/_next/image?url=https://upload.wikimedia.org/wikipedia/commons/thumb/6/6f/ChessSet.jpg/640px-ChessSet.jpg&w=640&q=50)
國際象棋
棋類遊戲 / From Wikipedia, the free encyclopedia
國際象棋(粵讀:gwok3 zai3 zoeng6 kei2;英文:chess),粵文又有叫歐洲象棋或者西洋棋,係一種兩個人對局嘅棋類遊戲:一個國際象棋棋盤會分做 64 個格仔,打橫 8 格、打戙 8 格,而喺一場對局啱啱開始嗰陣,每位玩家都有 16 隻棋-包括 1 隻國王、1 隻皇后、2 隻城堡、2 隻騎士、2 隻主教同埋 8 隻卒仔,每款棋嘅行法都唔同;每位玩家喺到佢行嗰陣都能夠郁自己方嘅一隻棋[註 1],而隻遊戲嘅目標係要有技巧噉行自己啲棋,務求將對方嘅國王迫入一個「無論跟住落嚟點行都會死」嘅處境-即係所謂嘅將死(checkmate)。國際象棋冇任何隱藏資訊-喺任何時間點,雙方都能夠睇到嗮棋盤上每隻棋喺邊個位[1]。
國際象棋相當之古老:國際象棋嘅前身源於印度同波斯(而家嘅伊朗)等地[2],事實係,英文當中嘅 checkmate 係源自波斯文 shāh māt 嘅-呢句嘢喺波斯文裏面係「國王陷入無助」噉嘅意思[3];家陣見到嘅國際象棋係喺 15 世紀後半橛响歐洲南部成形嘅,而打後喺 19 世紀,啲人開始搞大型嘅國際象棋比賽,亦都因為噉令到國際間出現咗一套標準嘅國際象棋規則[4]。
自從嗰時之後,國際象棋吸引咗社會各界嘅人嘅關注:有唔少人會為國際象棋寫書,討論點樣學捉國際象棋同埋研究國際象棋理論,而呢啲知識對數學[5]、電腦科學[6]以至認知科學[7]等嘅領域都有返咁上下影響力。到咗廿一世紀初,國際象棋係全世界最受歡迎、最家傳戶曉嘅遊戲之一,而同國際象棋相關嘅意像同橋段仲時不時會喺大眾媒體嗰度出現[註 2]。