經濟學
From Wikipedia, the free encyclopedia
- 微觀(micro)經濟學著重分析經濟體嘅基本組成元件同呢啲元件之間嘅互動-「基本元素」包括咗個人、家庭、公司、買家同賣家呀噉;而
- 宏觀(macro)經濟學會成個經濟體噉分析,研究一啲描述個經濟體嘅總體屬性嘅變數,好似係本地生產總值、失業率同通脹呀噉。
呢啲微觀嘅物體同埋經濟體嘅宏觀屬性仲會互相影響,形成各種各樣嘅經濟現象[3][4]。
經濟學唔淨只會客觀噉研究經濟現象,仲會思考一個經濟體點先係「理想」:經濟學有得細分做集中思考「經濟客觀睇係點」嘅實證(positive)經濟學同埋集中思考「經濟應該係點」嘅規範(normative)經濟學;前者會嘗試理解經濟體跟從乜嘢法則運作,似一門科學,而後者就往往會運用前者嘅研究得出嘅結果,思考要點樣操作一個經濟體,先可以令個經濟體達到理想嘅狀態-「理想」呢家嘢係有少少主觀嘅。規範經濟學喺經濟政策嘅制定上扮演咗舉足輕重嘅角色[5][6]。
經濟學研究既有理論性貢獻,又有實用價值[7][8]。經濟學同多數嘅社會科學比起上嚟精確好多,好多時會運用數學方程式描述、模擬、同預測所研究嘅現象。所以學術界喺 1968 年創立諾貝爾經濟學獎,承認經濟學係一門嚴謹嘅科學同表揚呢個領域對人類嘅貢獻[9]。