電壓
From Wikipedia, the free encyclopedia
電壓(粵拼:din6 aat3;英文:voltage)[1][2][3],又叫做電勢差或者電位差,係古典電磁學上一個好緊要嘅概念。佢描述緊一個單位嘅電荷喺一個電場入面嘅唔同位置之間嘅能量差:簡單啲講,如果一個電場內部各位置之間嘅電壓數值愈高嘅話,噉就表示嗰個電場所引致嘅能量釋放或者吸收愈犀利,所以電壓亦都描述咗一個電場有幾勁。
例如而家有一舊電芯俾人駁落去一個電路嗰度,佢會喺個電路入面產生一股電場。呢股電場會對佢內部嗰啲帶電荷嘅粒子施一股靜電力。根據牛頓力學,當有一舊嘢受到一個力場嘅力嘅作用嗰陣,假如冇其他嘅力作用喺佢身上,佢會順住股力場嘅力嘅方向嚟郁,而佢噉做會令到佢釋放勢能(Potential energy;能量嘅一種);而如果佢因為受到某啲外力而抗拒住股力場噉嚟郁-即係向住同股力場嘅力相反嘅方向郁-嘅話,佢就會吸收勢能。因為喺正常情況下唔會有乜嘢外力施喺啲帶電粒子身上,所以粒電芯所產生嘅電場同埋跟住會造成嘅電壓會令到個電路入面嘅質子同電子等嘅粒子大規模噉向住某啲特定方向郁,形成電流。
喺國際單位制嗰度,電壓嘅單位係伏特(Volt)。如果一個電場入面某兩個位置之間嘅電壓係「1 伏特」,噉就表示咗喺呢個電場入面,當有 1 庫侖噉多嘅電荷喺嗰兩個位置之間順住個電場嘅力嚟郁嗰陣,佢總共會釋放 1 焦耳噉多嘅勢能;而如果佢沿住同一條線抵抗住個電場噉嚟郁,佢總共會吸收 1 焦耳嘅勢能。
用嚟代表電壓嘅數學符號有 V、∆V、U、同埋 ∆U,英文通常會用 V(「Voltage」嘅第一個字母),而國際電化學詞彙同一啲語言就興用 U(拉丁話「urgēre」嘅第一個字母)。當中香港慣咗用前者,而中國大陸慣咗用後者。