Louis Trichardt, Limpopo

Louis Trichardt is 'n dorp in die Limpopoprovinsie van Suid-Afrika. Dit lê aan die voet van die Soutpansberg wat 'n vrugbare gebied is vir die verbouing van lietsjies, piesangs, veselperskes en neute. Dit is in Februarie 1899 gestig.

Louis Trichardt Makhado (2003–2007)
Dorp
Lugfoto van Louis Trichardt
Louis Trichardt  Louis Trichardt se ligging in Limpopo
Koördinate: 23°03′0″S 29°54′0″O
Land	Suid-Afrika
Provinsie	Limpopo
Distrik	Vhembe
Munisipaliteit	Makhado
Stigting	1899
Oppervlak [1]
• Totaal	56,42 km2 (21,78 vk. myl)
Bevolking  (2011)[1]
• Totaal	25 360
• Digtheid	449/km2 (1 160/vk. myl)
Rasverdeling (2011) [1]
• Wit mense	20.0%
• Indiërs/Asiërs	5.7%
• Bruin mense	1.3%
• Swart mense	72.7%
• Ander	0.3%
Taal (2011) [1]
• Venda	39.5%
• Afrikaans	22.8%
• Engels	11.7%
• Noord-Sotho	6.6%
• Ander	19.4%
Poskode (strate)	0920
Poskode (posbusse)	0920
Skakelkode	015

Louis Trichardt is vernoem na die Voortrekkerleier Louis Tregardt. Die amptelike naam is op 20 Junie 2003 verander na Makhado, maar dié verandering is in 2007 deur die appèlhof omgekeer toe beslis is dat daar nie voldoende konsultasie met die gemeenskap was nie. Die aanvanklike naamsverandering was nie net ongewild by Afrikaners nie, maar ook by die BaPedi en Shangaan, wat die eertydse Vendaleier, Makhado, as 'n onderdrukker beskou.

Ligging en uitleg

Louis Trichardt is geleë op die N1 nasionale pad vanaf Gauteng na Zimbabwe, en die R524 roete wat uit die weste en ooste by onderskeidelik Rissik- en Songwozistrate aansluit. Die dorp is 100 km noord van Polokwane (Pietersburg) en 100 km suid van Musina (voorheen Messina), en reg suid van Hanglip, oftewel Songwezi, 'n prominente kop in die bergreeks. Verskeie strate dra die name van Boereleiers. Dit is opmerklik dat etlike daarvan vrymesselaars soos Piet Retief gedenk, en vrymesselary het in die ontstaansdae van die dorp inderdaad 'n sterk teenwoordigheid gehandhaaf.^[2]

Gerard Moerdijk, argitek van onder meer die Voortrekkermonument, het die kerkgebou van die NG gemeente Louis Trichardt ontwerp. Dié gebou in die dorpsmidde is feitlik identies aan die ontwerp wat vir die kerkgebou van die NG gemeente Harare gebruik is. Ook in die dorpsmidde is die boomryke Voortrekkerplein en Fort Hendrina, 'n beweegbare yster-opslaanfort. Dit dateer uit die tyd van die Eerste Vryheidsoorlog, en is in die Tweede Vryheidsoorlog deur die Britte oorgeneem, toe dit deur onder meer Breaker Morant as Fort Edward benut is. 'n Inheemse boomreservaat lê aan die N1. Forestryweg aan die dorp se noordekant lei na die bosboustasie en Hanglipbos.

Demografie

In 2011 het die dorp en omliggende dele 'n bevolking van 25 360 gehad, waarvan 5 077 (20,0%) Blank was.^[3]

Sien ook

• Gereformeerde kerk Louis Trichardt
• Lys van dorpe in Suid-Afrika
• NG gemeente Louis Trichardt
• Albasinidam

Eksterne skakels

• Makhado nou weer Louis Trichardt, sê appèlhof Geargiveer 1 Oktober 2007 op Wayback Machine Beeld, 29 Maart 2007

Bronnelys

• Beeld, 15 September 2005 Duur standbeeld loop deur onder vandale se verf.