Snyblomme

Snyblomme is blomme of blomknoppe (dikwels nog met die stingel en blare aan) wat gesny is van die plant wat dit dra. Dit word van die plant verwyder vir dekoratiewe gebruik. Tipiese gebruike is in vaasuitstallings, kranse en slingers. Baie tuiniers oes hul eie snyblomme uit hul tuine, maar daar is 'n beduidende blommebedryf vir snyblomme in meeste lande. Die plante wat gesny word, wissel volgens klimaat, kultuur en die plaaslike welvaart. Dikwels word die plante spesifiek vir die doel gekweek, in veld- of kweekhuisomstandighede. Snyblomme kan ook in die natuur geoes word.

Rose, hydrangea en calla in 'n blomruiker by 'n troue

Kransverkopers in Vrindavan, Indië

'n Blommemark in Viëtnam

Snyblomme is 'n belangrike siergewas. Die verbouing en handel van blomme is 'n spesialisering in tuinbou, spesifiek blombou.

Verbouing

Snyblomverbouing is intensief, gewoonlik op grond van kweekhuis-monokultuur, en benodig groot hoeveelhede giftige plaagdoders, oorblyfsels waarvan dikwels nog steeds in blommewinkels op ingevoerde blomme gevind word.^[1][2][3]

Hierdie feite het die ontwikkeling van bewegings soos "Slow Flowers" aangespoor, wat volhoubare blomme verbou in die verbruikersland (VSA, Kanada) self.^[4]

Gebruike

'n Algemene gebruik is deur bloemiste, gewoonlik vir versiering in 'n huis of gebou. Die snyblomme word gewoonlik in 'n vaas of ander houer geplaas. 'n Aantal soortgelyke versierings word gebruik, veral in groter geboue en by geleenthede soos troues. Hierdie is dikwels versier met addisionele blare.

In sommige kulture is die gebruik van snyblomme hoofsaaklik vir aanbidding; dit kan veral in Suidoos-Asië gesien word.

Soms word die blomme gepluk eerder as gesny, sonder enige noemenswaardige blare of stingel. Sulke blomme kan gebruik word om in hare te dra of in 'n knoopsgat. Massas blomme kan gebruik word vir besprenkeling, op 'n soortgelyke manier as konfetti.

Slingers, kranse en blomruikers is belangrike afgeleide produkte met toegevoegde waarde.

Sien ook

• Blommerangskikking