Anke Fuchs

D Anke Fuchs (* 5. Juli 1937 z Hamburg as Anke Nevermann; † 14. Oktober 2019 z Wilhelmshaven^[1][2]) isch e dytschi Bolitikeri (SPD) gsii.

d Anke Fuchs, 1982

D Fuchs isch vu April bis Oktober 1982 Bundesminischteri fir Juuged, Familie un Gsundhait un vu 1998 bis 2002 Vizebresidänti vum Dytsche Bundesdaag gsii.

Uusbildig un Beruef

D Anke Fuchs isch e Doochter vum friejere Hamburger Eerschte Buurgermaischter Paul Nevermann (SPD) gsii.^[3] Noch em Abitur 1956 het si ne Studium vu dr Räächtswisseschaft aagfange, wu si mit em Eerschte Staatsexame abgschlosse het. Anne 1964 het si s Zwait Juristisch Staatsexame abglait. Derno isch si bis 1968 Referänti fir Aerbetsräächt un Sozialbolitik bim DGB-Bezirk Nordmark gsii. 1971 bis 1977 het si d Funktion vun eme gschäftsfierende Vorstandsmitgliid vu dr IG Metall ibernuu.

Familie

D Anke Fuchs isch ghyroote gsii mit em friejere Bremer Staatsroot Andreas Fuchs un het zwai Chinder ghaa. Ihri Brieder Jan un Knut Nevermann sin au in d Bolitik gange un in SPD yydrätte.

Bartei

d Anke Fuchs 1988 uf em SPD-Barteidaag z Münster

Syter 1956 isch d Fuchs Mitgliid vu dr SPD gsii. Ab 1979 het si em SPD-Bundesvorstand aagheert. Fir d Landdaagswahl z Niidersachse am 15. Juni 1986 isch s zeerscht as SPD-Spitzekandidati dischpetiert woore. Wu aber dr friejer Juso-Vorsitzer un jinger Verdrätter Gerhard Schröder sy Kandidatur aagchindet un doderzue d Unterstitzig vu mehrere Kraisverbänd vu dr Bartei iberchuu het, het d Fuchs verziichtet. Vu 1986 bis 1991 isch si Mitgliid im Presidium vu dr SPD gsii. Vum 15. Juni 1987 bis anne 1991 isch si as eerschti Frau Bundesgschäftsfiereri vu dr SPD gsii.

Bi dr Wahl vum eerschte Sächsische Landdaag noch em Änd vu dr DDR am 14. Oktober 1990 het si geg dr Kurt Biedenkopf as Spitzekandidati vu dr SPD kandidiert. Si isch dodermit di eerscht Frau gsii, wu z Dytschland bi re Landdagswahl as Spitzekandidati vun ere Volksbartei aadrätten isch. Wel ihri Bartei bi dr Wahl schläächt abgschnitte het, isch si aber nit Minischterbresidänti woore. Dr Zwootstimmenaadail vu 19,1 % isch aber bis hite (2019) s bescht Landdaagswahlergeebnis vu dr sächsische SPD.

Abgoordneti

Wu anne 1971 d Verfassig vu dr Freien un Hansestadt Hamburg eso gänderet wooren isch, ass s Buurgerschaftsmandat vu Senatore ab doo gruet het, isch si am 19. Februar 1971 fir en Senator in d Hamburgisch Buurgerschaft noogruckt. Si het s Mandat aber scho zum 31. Dezämber 1971 wäg ihre Aarbet fir d IG Metall wider niiderglait.

Vu 1980 bis 2002 isch si Mitgliid vum Dytsche Bundesdaag gsii. Vu April 1993 bis Oktober 1998 isch si doo Stellverdrättendi Vorsitzeri vu dr SPD-Bundesdaagsfrakzioon gsii. Vu Oktober 1998 bis Oktober 2002 isch si Vizebresidänti vum Dytsche Bundesdaag gsii.

D Anke Fuchs isch anne 1980 un 1998 as diräkt gwehlti Abgoordneti vum Wahlkrais Köln II un sunscht immer iber d Landeslischt Nordrhyy-Weschtfaale in Bundesdaag yyzooge.

Effetligi Ämter

Am 26. April 1977 isch si zur Staatssekreteeri im Bundesminischterium fir Aerbet un Sozialoornig ernännt woore.

No dr Bundesdaagswahl 1980 isch si zur Barlemäntarische Staatssekreteeri bim Bundesminischter fir Aerbet un Sozialoornig beruefe woore.

Im Zuug vun ere Kabinettsumbildig isch si no chuurz vor em Änd vu dr sozialliberale Koalizioon am 28. April 1982 zur Bundesminischteri fir Juuged, Familie un Gsundhait ernännt woore. No dr Wahl vum Helmut Kohl zum Bundeschanzler isch si am 4. Oktober 1982 us dr Bundesregierig uusgschiide.

Gsellschaftligi Ämter

Vu 1995 bis 2007 isch si Bresidänti vum Dytsche Mieterbund gsii, en Amt, wu vorhäär au scho ihre Vater ghaa het. Derzue isch si Vorsitzeri vu dr Friedrich-Ebert-Stiftig (2003 bis 2010) un au Vorsitzeri vum Ufsichtsroot vu dr DMB Rechtsschutz-Versicherung AG.

Ehrige

• Verdienschtoorde vu dr Bundesrepublik Dytschland mit Grooßem Verdienschtchryz (1986) mit Stäärn (1997) un Achsleband (2002)

Weblink

 Commons: Category: – Album mit Multimediadateie

• Biographie beim Deutschen Bundestag
• Anke Fuchs Zeitzeugin im Videointerview