Basel-Breite

Breiti (hochdytsch Breite) isch ä Quartier vo dr Stadt Basel. Es ligt am estlige Ändi vom Grossbasel, wo d Birs in Rhii fliesst (Birskepfli). Die westligi Quartiergränze isch am Dalbediich, ä Gwärbkanal, wo s Dalbekloster im Mittelalter het lo baue. Uf dr andere Site vom Kanal sin s Dalbe-Quartier und d Vorstedt, im Norde isch dr Rhii und im Oste d Birs und Birsfälde im Baselbiet.

Breiti Quartier vo Basel
Flechi	0,68 km²
Iiwohner	8366 (Jan. 2003)
Bevölkerigsdichti	8366 / 0.68 Iiwohner/km²
Usländeraadeil	25,4 %
BFS-Nr.	2701-004
Postleitzahl	4052

Dialäkt: Baseldytsch

S Breiti-Quartier het si Name vom freie, ebene Fäld bikoo, wo friehner zwischem Dalbe-Quartier und der Birs uf dr underste Flussterasse glägen isch. Scho im 14. Johrhundert het mä däm Fäld so gsait. Vo 1811 aa het mä dr Strooss, wo dur s Fäld uf Birsfälde und vo därt uf Ziri gfiehrt het, die Breiti Stross gsait. In de 1850er-Johr isch dere Stross noo ä neji Arbeitersiedlig baut worde, s hitig Breiti-Quartier, und mä het dr Name vo der Stross in Zircherstross gänderet.

D Braitlemer, wie mä de Iiwohner vom Breiti-Quartier in dr Umgangssproch sait, sin hit zu drei Viertel in der Dienstlaistigsbranche dätig. In de 1980er Johr sins no ä gli weniger as d Helfti gsi. Wichtigi Wirtschaftsbranche sin s Baugwärb, d Elektrotechnik, d Optik, d Fiinmechanik und dr Maschinebau.^[1]

Meh as d Helfti vo de Hyser im Quartier ghere Privatpersone, aber ebben ä Fimftel ghere Wohngnosseschafte. D Wohnige sin gresser as ebben in dr Altstadt, aber s het sehr vil weniger Wohnige mit vier und meh Zimmer as im Kantonsdurchschnitt.^[1]

Hyser und Sehnswirdikeite

• D Don-Bosco-Kirche
• Dr Dalbediich
• S Birskepfli
• Dr Letzidurm