Fondation Beyeler

D Fondation Beyeler isch e Schwizer Kunstmuseum und e Stifdig mit Sitz in Rieche im Kanton Baasel-Stadt.

Fondation Beyeler

Bligg vom Park us
Date
Ort	Rieche BS
Art	klassischi Modärne
Archidekt	Renzo Piano
Eröffnig	18. Oktober 1997
Bsuecherzahl (jöhrlig)	368'705 (2012)[1]
Leitig	Sam Keller
Website	www.fondationbeyeler.ch

Dialäkt: Baseldütsch

Skulpture vom Alexander Calder (vorne) und vom Ellsworth Kelly im Park vo dr Fondation

Dr Fondation Beyeler ghöört d Kunstsammlig vo dr Hildy und vom Ernst Beyeler, wo s Ehebaar wäärend öbbe 50 Joor gsammlet het und wo 1982 in d Stifdig überfüert worde isch. 1989 isch d Sammlig mit em Schwerpunggt uf die klassischi Modärne und d Geegewartskunst zum erste Mol öffentlig zäigt worde, und zwar im Museo Nacional Centro de Arte Reina Sofía z Madrid.

Dr Diräggter vo dr Fondation Beyeler isch zerst dr Ernst Beyeler sälber gsi, vom 1. April 2003 aa dr Christoph Vitali und sit em Januar 2008 isch s dr Sam Keller.

S Museumsgeböid

1994 het dr Archidekt Renzo Piano dr Ufdraag überchoo, für d Sammlig en öffentligs Museum z baue. Es isch denn am 18. Oktober 1997 im Park vom Berower Guet z Rieche bi Baasel (Schwiz) eröffnet worde. Dr Museumsbau isch uf e glungeni Art in d Umgääbig iibettet, mit eme Bligg uf Obstmatte in de Langen Erle und uf s Flussdaal vo dr Wiise. Dr Bau isch 127 Meter lang und lit an dr verkeersriiche Baaselstrooss; gegen e Lärm het s e Muure, wo mit Porphyrblatte verkläidet isch.

D Sammlig

In dr Sammlig Beyeler het s öbbe 250 Wärk us dr klassische Modärne und dr Geegewartskunst. Si dokumentiert dr persönlig Bligg vom Galeriste-Ehebaars Hildy und Ernst Beyeler uf d Kunst vom 20. Joorhundert. Under anderem wärde Wärk vom Degas, Cézanne, Monet, Rousseau, van Gogh, Kandinsky, Matisse, Léger, Giacometti, Picasso, Miró, Calder, Klee, Ernst, Mondrian, Warhol, Lichtenstein oder Bacon zäigt.^[2] D Rothko Rooms si e Presentazion vo Wärk vo däm Künstler, wo usserhalb vo de USA äimoolig isch. De Kunstwärk vo dr klassische Modärne wärde öbbe 25 Objekt us dr Kunst vo Stämm us Afrika, Ozeanie und Alaska gegenübergstellt.

1999 het mä dr groossi Saal im Norde vom Geböid um zwölf Meter erwiteret, so dass sithäär e Driddel vo dr Ustelligsflechi, wo im Ganze 3800 Quadratmeter gross isch, für Sonderusstellige vha reserwiert wärde. Die ergänze die ständigi Sammlig oder stönde mit ere im Dialog. Au im Gaarde um s Museum ume wärde immer wider Sonderusstellige zäigt, wo mä nid in s Museum iine muess zum sä aaluege.

Usstellige (Uswaal)

• 2011: Constantin Brâncuși & Richard Serra
• 2011/12: Dalí, Magritte, Miró – Surrealismus in Paris, 2. Oktober 2011 bis 29. Januar 2012 ^[3]
• 2012: Pierre Bonnard, 29. Januar bis 13. Mai 2012
• 2012/13: Edgar Degas, 30. Septämber 2012 bis 27. Januar 2013^[4]
• 2013: Ferdinand Hodler, 27. Januar bis 26. Mai 2013
• 2013: Collection Renard, 9. Merz bis 5. Mai^[5]
• 2013: Max Ernst, 26. Mai bis 8. Septämber 2013
• 2013: Maurizio Cattelan, 8. Juni bis 6. Oktober 2013^[6]
• 2013: Thomas Schütte, 6. Oktober bis 2. Februar 2014
• 2014: Odilon Redon, 2. Februar bis 18. Mai 2014

Film

• Fondation Beyeler in Riehen bei Basel. Dokumentarfilm, Dütschland, 2011, 29:30 Min., Buech und Reschii: Martina Klug, Produktion: SWR, 3sat, Ersti Sändig: 13. Novämber 2011, Räije: Museums-Check mit em Markus Brock, Inhaltsaagoob und Video vo 3sat, mit em Dani Levy und em Diräggter Sam Keller.

Weblingg

 Commons: Fondation Beyeler – Sammlig vo Multimediadateie

• Fondation Beyeler
• Bäume an der Fondation Beyeler 1998 von Christo und Jeanne-Claude verhüllt
• Fotos in der Bilder-Datenbank des Kantons Basel-Stadt
• «Dalí, Magritte, Miró – Surrealismus in Paris» – eine Ausstellung der Fondation Beyeler in Riehen. In: NZZ vom 29. Oktober 2011
• Ausstellungen in der Fondation Beyeler uf kunstaspekte.de