Асьвейскае возера

Асьве́йскае — возера ў Беларусі, у басэйне ракі Дрысы. Знаходзіцца ў Дрысенскім раёне Віцебскае вобласьці, за 40 км ад места Дрысы. Плошча паверхні возера 52,8 км² (другое паводле плошчы возера ў краіне). Даўжыня 11,4 км, найбольшая шырыня 7,8 км. Найбольшая глыбіня дасягае 7,5 м. Даўжыня берагавой лініі 33,4 км. Плошча вадазбору 259 км²^[1].

Ня варта блытаць з Асьвеяй — мястэчкам у Дрысенскім раёне, а таксама возерам у Летуве.

Возера Асьвейскае лац. Aśviejskaje Панарама возера Асьвейскага Возера Асьвейскае Краіна Беларусь Плошча 52,8 км² Плошча вадазбору 259 км² Максымальная глыбіня 7,5 м Сярэдняя глыбіня 2,0 м Найбольшая даўжыня 11,4 км Найбольшая шырыня 7,8 км Даўжыня берагавой лініі 33,4 км Вышыня над узроўнем мора 129,8 м Каардынаты 56°2′ пн. ш. 28°8′ у. д. Асьвейскае на мапе Беларусі Асьвейскае

Галерэя здымкаў у Вікісховішчы

На паўднёвым беразе возера стаіць мястэчка Асьвея.

Асноўныя зьвесткі

Возера Асьвейскае

Катлавіна падпруднага тыпу. Схілы — узвышшы і грады вышынёй 10—30 мэтраў, у большасьці пакрытыя лесам. На захадзе ад возера прылягае Асьвейскае балота. Берагі нізкія, тарфяніста-пясковыя, парослыя хмызьняком. У разводзьдзе да 2 км² узьбярэжжа знаходзіцца пад вадой.

Дно возера глеістае, ля паўночна-ўсходняга берагу — глеіста-пясковае. У заходняй частцы возера знаходзіцца выспа, плошчай блізу 5 км², вышынёй да 30 мэтраў.

Да возера ўпадае 16 рачулак і мэліярацыйных каналаў, рака Выдранка. Выцякае рака Дзегцяроўка, празь якую Асьвейскае возера мае сьцёк у возера Лісна.

У Асьвейскім возеры знаходзіцца найбольшая выспа ў Беларусі — Манастыршчына, плошчай 5 км². Таксама на возеры ёсьць плавучая выспа з сплеценага гальля й водарасьцяў. На ёй расьце хмызьняк і невялічкія дрэўцы, гнезьдзяцца птушкі.

Флёра і фаўна

У возеры водзіцца лешч, шчупак, судак, карась, мянтуз, вугор. На берагах жыве андатра, бабёр; масавае гнездаваньне птушак, такіх як лебедзь-шыпун. Таксама возера — найбуйнейшае ў рэгіёне Паазер’я месца размнажэньня і пасьлягнездавой канцэнтрацыі некаторых паляўнічых відаў вадаплаўных птушак: качкі-крыжанкі (Anas platyrhynchos), нырка-сівака (Aythya ferina) і лыскі (Fulica atra). Акрамя таго, возера і навакольныя тэрыторыі — месца сталай канцэнтрацыі водна-балотных відаў птушак у пэрыяд міграцыяў увясну і ўвосень.