Белінвэстбанк

Адкрытае акцыянэрнае таварыства «Белару́скі банк разьвіцьця́ і рэканстру́кцыі „Белінвэстба́нк“» — камэрцыйны банк у Рэспубліцы Беларусь. Асноўны бэнэфіцыяр — Дзяржаўны камітэт па маёмасьці Рэспублікі Беларусь (97,5% акцыяў)^[3]. Статутны фонд — 231,4 млн руб (2017)^[4]. Унесены ў Чорны сьпіс Эўразьвязу.

Беларускі банк разьвіцьця і рэканструкцыі «Белінвэстбанк»
Тып	Адкрытае акцыянэрнае таварыства
Заснаваная	3 верасьня 2001 (23 гады таму)
Краіна	Беларусь
Разьмяшчэньне	220002, Менск, пр. Машэрава, 29
Ключавыя фігуры	Старшыня праўленьня Андрэй Брышцелеў
Галіна	банкаўская дзейнасьць
Прадукцыя	банкаўскія паслугі
Абарачэньне	▲1 639 млрд рублёў (2009 год; 584,7 млн $)
Апэрацыйны прыбытак	▼1 602 755 млн рублёў (2015)
Чысты прыбытак	▼24 259 млн рублёў (2015[1])
Лік супрацоўнікаў	▼2290 чал. (2020)[2]
Матчына кампанія	Дзяржаўны камітэт па маёмасьці Рэспублікі Беларусь
Даччыныя кампаніі	«Белбізнэслізінг», аграфірма «Фалічы»
Аўдытар	«BDO International Limited»
Белівестбанк.бел

Дзейнасьць

Мае 6 абласных управаў, 150 пунктаў продажу паслугаў^[5]. Ад 2002 году мае замежнае прадстаўніцтва ў Варшаве (Польшча)^[6].

Падпарадкоўваецца Дзяржаўнаму камітэту па маёмасьці Рэспублікі Беларусь, бо ўраду належаць больш як 97,5% акцыяў^[3]. Ва ўласным падпарадкаваньні мае чатыры даччыныя прадпрыемствы:

1. «Белбізнэслізінг»;
2. «Белінвэст-інжынірынг»;
3. аграфірму «Фалічы»;
4. «Гарызонт-Белінвэст-Дэвэляпэр»^[7].

На 1 лютага 2017 году памер зарэгістраванага статутнага фонду ААТ «Белінвэстбанк» склаў 231,4 млн рублёў^[4]. Доля дзяржавы ў статутным фондзе — 99,1%^[3]. Балянсавы прыбытак (на 1 лютага 2017) — 0,2 млн руб.

Рэквізыты

Поўнае найменьне: адкрытае акцыянэрнае таварыства «Беларускі банк разьвіцьця і рэканструкцыі „Белінвэстбанк“». Скарочана: ААТ «Белінвэстбанк».

БІК — 153001739. S.W.I.F.T. — BLBB BY 2X. АКПА — 37558116. УНП — 807000028^[8].

Гісторыя

15 красавіка 1992 году чатыры камэрцыйныя банкі — «Менскбізнэсбанк», «Жылкамбанк», «Магабанк» і «Гароднякамбанк» — утварылі Беларускі акцыянэрны камэрцыйны банк рэканструкцыі і разьвіцьця «Белбізнэсбанк»^[9]. 3 верасьня 2001 году шляхам зьліваньня «Белбізнэсбанку» і ААТ «Беларускі банк разьвіцьця» быў заснаваны «Белінвэстбанк»^[5].

У 2005 годзе банку нададзены статус інвэстыцыйнага банку. «Белінвэстбанк» зьяўляецца ўпаўнаважаным банкам па абслугоўваньні дзяржаўных праграмаў.

Прыпыняў пазычаньне 1—15 сьнежня 2008 году^[10].

Міжнародныя санкцыі

24 чэрвеня 2021 году быў унесены ў Чорны сьпіс Эўразьвязу. Санкцыі Эўрапейскага Зьвязу прадугледжваюць абмяжаваньні на пазыкі на рынках ЭЗ і даступнасьць крэдытаў з тэрмінам пагашэньня ў больш чым 90 дзён ад эўрапейскіх контрагентаў. 20 жніўня 2021 году «Fitch Ratings(uk)» выставіла банку рэйтынг «B» з нэгатыўным прагнозам. Адначасова з гэтым агенцыя адклікала рэйтынг па прычыне ўнясеньня банка ў санкцыйны сьпіс і паведаміла, што больш ня будзе ацэньваць альбо рабіць іншы аналіз дзейнасьці «Белінвэстбанку»^[11].

24 лютага 2022 году Белінвестбанк і прыналежныя яму «Белбізнеслізінг» і «Белінвест-Інжынірынг» былі ўнесеныя ў сьпіс спэцыяльна вызначаных грамадзянаў і заблякаваных асобаў ЗША^[12]. У тым жа годзе ўсе гэтыя кампаніі трапілі у санкцыйныя спісы Канады, Украіны, Швайцарыі ды Японіі, а Вялікабрытанія ўвяла санкцыі супраць «Белбізнеслізінгу» і «Белінвест-Інжынірынгу»^[13][14][15]. У 2023 годзе Белінвестбанк, «Белбізнеслізінг» і «Белінвест-Інжынірынг» трапілі пад санкцыі Новай Зэляндыі^[16].