Сьпіс спэцыяльна вызначаных грамадзянаў і заблякаваных асобаў

Сьпіс спэцыя́льна вы́значаных грамадзя́наў і заблякава́ных асо́баў (па-ангельску: Specially Designated Nationals and Blocked Persons), Сьпіс СВГ — сьпіс асобаў і прадпрыемстваў, зь якімі грамадзянам і кампаніям ЗША забараняецца весьці справы.

Абнародуецца Ўправай кантролю за замежнымі актывамі Ведамства скарбу ЗША^[1][2]. Сярод іншых у сьпіс ўключаюцца ваеначальнікі, службовыя асобы тыраніяў і міжнародныя злачынцы^[3]. Улучае таксама гандляроў дурманамі і тэрарыстаў, а таксама іх суполкі і ўстановы. Складаецца з тысячаў запісаў, у той час як дзясяткі тысячаў людзей і арганізацыяў хаця б аднойчы былі санкцыяваны^[4].

Ігар Сечын(uk), першы віцэ-прэм’ер Расейскай Федэрацыі, фігурант сьпісу СВГ

Агляд

Кампаніі, арганізацыі й асобы, унесеныя ў сьпіс СВГ, у асноўным займаюцца тэрарыстычнаю або таталітарнаю дзейнасьцю, вызначанаю ЗША, і маюць на мэце нанесьці шкоду нацыянальнай бясьпецы й зьнешняй ды эканамічнай палітыцы ЗША^[5][6]. Усім фізычным і юрыдычным асобам у Злучаных Штатах забаронена гандляваць з суб’ектамі, якія знаходзяцца ў чорным сьпісе, інакш гэта будзе парушэньне закону й будуць накладзены санкцыі. Адпаведныя фінансавыя санкцыі ўключаюць забарону інвэставаць у акцыі асобаў і кампаніяў, якія трапілі пад санкцыі, пазычаць грошы (у тым ліку праз аблігацыі, крэдыты, вэксэлі й іншыя каштоўныя паперы), якія перавышаюць 90 дзён. Пасьля анэксіі Крыму Расеяю(be) 2014 году ЗША пасьлядоўна дадалі ў чорны сьпіс шэраг расейскіх і ўкраінскіх асобаў^[7].

Уплыў

Любая кампанія, якая вядзе бізнэс са Злучанымі Штатамі або мае зьдзелкі, зьвязаныя з ЗША, рэгулюецца адпаведнымі палажэньнямі й мае патрэбу ў аказаньні дапамогі ў рэалізацыі санкцыяў у дачыненьні да асобаў, якія ўваходзяць у сьпіс СВГ. Яны ня могуць заключаць аніякіх зьдзелак з фігурантамі сьпісу СВГ, інакш да іх будуць прыменены другасныя санкцыі. Такім чынам, акрамя замарожваньня актываў у ЗША для асобаў у сьпісе СВГ, банкаўскія паслугі ў іх родных краінах таксама могуць быць недаступны, напрыклад выпуск і абслугоўваньне крэдытных картак міжнародных плацёжных сыстэмаў^[8][9]. Паколькі сыстэма SWIFT і разьлікі ў далярах ЗША важныя для міжнароднай банкаўскай сыстэмы, банкі не гатовыя весьці бізнэс з санкцыяванымі асобамі^[10].

Ван Куок-Кой(zh-yue), былы лідэр банды «14K(pl)» у Макао, фігурант сьпісу СВГ

Вядомыя асобы ў сьпісе (няпоўны пералік)

Вынік пошуку на імя Кэры Лам у сьпісе СВГ

Беларусь

• «Абсалютбанк»
• Акрэсьціна
• Аляксандар Лукашэнка
• Натальля Эйсмант
• Мікалай Лазавік

Ганконг

• Кэры Лам(uk)^[11][9]

Іран

• Ібрагім Раісі(be)

Ісламская дзяржава

• Абу Бакр аль-Багдадзі(be)

КНДР

• Кім Чэн Ын

Расея й Крым

• Мікола Азараў
• Сяргей Аксёнаў(be)
• Сяргей Арбузаў(be)

Сырыя

• Башар Асад

Югаславія

• Слабадан Мілошавіч

Інцыдэнты

У 2014 годзе францускі банк «BNP Paribas(en)», які паводле некаторых зьвестак адмыў да 100 млрд. даляраў ЗША з санкцыйных асобаў Судану, Ірану й Кубы, прызнаў сябе вінаватым у судзе штату Нью-Ёрк у фальсыфікацыі справаводзтва, а таксама ў змове ў сувязі з фальсыфікацыямі й пагадзіўся сплаціць 8,9 мільярдаў даляраў ЗША, што зьяўляецца самым вялікім штрафам за парушэньне санкцыяў ЗША^[12][13][14].

У 2017 годзе група прыватных актывістаў у Швайцарыі заявіла, што ня можа купіць кампутары ў ЗША, таму што па ейным адрасе таксама была зарэгістравана Арганізацыя гуманітарнай дапамогі для Палестыны, занесеная ў сьпіс спэцыяльна вызначаных грамадзянаў і заблякаваных асобаў праз абвінавачваньні ў падбухторваньні да тэрарыстычнай дзейнасьці^[2][15].

Фату Бэнсуда (галоўны пракурор Міжнароднага крымінальнага суда), адказная за расьсьледаваньне злачынстваў амэрыканскіх вайскоўцаў, вайскоўцаў Аўганскіх сіл нацыянальнай бясьпекі й вайскоўцаў Талібану падчас вайны ў Аўганістане(be), была ўнесена ў сьпіс 2 верасьня 2020 году, але была выдалена 2 красавіка 2021 году^[16][17].

Глядзіце таксама

• Катэгорыя:Беларускія асобы ў сьпісе спэцыяльна прызначаных грамадзянаў і заблякаваных асобаў
• Катэгорыя:Беларускія юрыдычныя асобы ў сьпісе СВГ