Выбухі ў Днепрапятроўску 2012 году

Вы́бухі ў Днепрапятро́ўску 2012 го́ду — 4 выбухі ўздоўж праспэкта К. Маркса ў Днепрапятроўску (Украіна) ўдзень 27 красавіка 2012 году. Паводле Міністэрства ўнутраных справаў Украіны, у выніку выбухаў пацярпелі 27 чалавек, зь іх 25 шпіталізавалі: аднаму ампутавалі руку, другі знаходзіўся ў цяжкім стане. Яшчэ 1 выбуховую прыладу абясшкодзілі. Пракуратура Днепрапятроўскай вобласьці завяла крымінальную справу па 258-м артыкуле Крымінальнага кодэкса Ўкраіны «Тэрарыстычны акт»^[1].

Выбухі ў Днепрапятроўску 2012 году
Месца атакі	Днепрапятроўск
Цэль атакі	Цывільныя месьцічы
Дата	27 красавіка 2012 (13 гадоў таму) 11:50-13:00
Спосаб атакі	падрыў бомбы
Зброя	бомба
Колькасьць параненых	27
Падазраваныя	2
Геаграфічныя каардынаты	48°28′07″ пн. ш. 35°02′18″ у. д.
Выбухі ў Днепрапятроўску 2012 году на мапе Ўкраіны Выбухі ў Днепрапятроўску 2012 году

30 траўня 2012 г. генэральны пракурор Украіны Віктар Пшонка паведаміў пра затрыманьне 4 падазраваных^[2]. 11 сакавіка 2014 г. Індустрыяльны раённы суд Днепрапятроўска выпусьціў 2 з 4 падазраваных на волю праз адсутнасьць доказаў^[3].

Выбухі

Усе 4 бомбы заклалі ў сьметніцы. Паводле Міністэрства надзвычайных сытуацыяў Украіны, сярод 27 параненых было 9 дзяцей^[4].

• Аб 11:50 выбух магутнасьцю ў 160 грамаў трынітраталуолу (ТНТ) адбыўся на трамвайным прыпынку «Опэрны тэатар» на прасп. К.Маркса. Пацярпелі 13 чалавек.
• А 12:20 — магутнасьцю ў 190 грамаў ТНТ каля кінатэатра «Радзіма». Сярод 11 параненых было 9 дзяцей^[5].
• А 12:45 — магутнасьцю ў 230 грамаў ТНТ каля ўваходу ў парк імя Лазара Глобы. Пацярпелі 3 чалавекі, зь іх аднаго шпіталізавалі.
• А 13:00 — на трамвайным прыпынку «Опэрны тэатар» магутнасьцю 300 грамаў ТНТ^[2].

Беларусь

28 красавіка 2012 г. Міністэрства замежных справаў Рэспублікі Беларусь выказала «шчырыя словы спачуваньня і падтрымкі ўсім украінцам, зь якімі нас зьвязваюць брацкія сувязі». Тым часам Сьледчы камітэт Рэспублікі Беларусь прапанаваў Генэральнай пракуратуры Ўкраіны дапамогу ў расьсьледаваньні^[6].