Галоўная ўправа ўнутраных справаў Менскага гарвыканкаму

Гало́ўная ўпра́ва ўну́траных спра́ваў Ме́нскага гарвыканка́му (скарочана ГУЎС Менгарвыканкаму) — гарадзкая ўправа Міністэрства ўнутраных справаў Рэспублікі Беларусь па горадзе Менску.

Галоўная ўправа ўнутраных справаў Менскага гарвыканкаму
наркам. ГУУС Мінгарвыканкама
Абрэвіятура	ГУУС МГВК
Дэвіз	Служым закону, народу, Айчыне
Дата ўтварэньня	4 сакавіка 1917 (108 гадоў таму)
Тып	праваахоўная
Юрыдычны статус	дзяржаўная ўстанова
Штаб-кватэра	Дабрамысьленскі зав., д. 5[1]
Месцазнаходжаньне	Маскоўскі раён
Дзейнічае ў рэгіёнах	Менск
Сяброўства	Міністэрства ўнутраных справаў Рэспублікі Беларусь
Афіцыйныя мовы	беларуская, расейская
Начальнік	Міхаіл Грыб
Намесьнікі	Ігар Падвойскі, Андрэй Русановіч[2]
Матчына кампанія	Менскі гарадзкі выканаўчы камітэт
Сайт	minsk.mvd.gov.by

Месьціцца ў Менску. Мае ў падпарадкаваньні раённыя ўправы ўнутраных справаў места Менску. Начальнік УУС прызначаецца міністрам унутраных справаў. Начальнік УУС мае званьне генэрал-маёра.

Склад

На 2021 год ГУУС Менгарвыканкаму ўлучала:

• крымінальную міліцыю ў складзе: 3-х управаў^[3] — 1) крымінальнага вышуку, 2) наркакантролю і сапрацьдзеяньня гандлю людзьмі, 3) барацьбы з эканамічнымі злачынствамі; аддзелу раскрыцьця злачынстваў у сфэры высокіх тэхналёгіяў;
• міліцыю грамадзкай бясьпекі, што ўлучала: 4 управы — 1) аховы правапарадку і прафіляктыкі, 2) грамадзянства і міграцыі; 3) дзяржаўнай аўтамабільный інспэкцыі, 4) Дэпартамэнту аховы; аддзел наглядна-выканаўчай дзейнасьці і атрад міліцыі асаблівага прызначэньня;
• іншых 9 падразьдзяленьняў, у тым ліку: 3-ю ўправу Галоўнай управы ўласнай бясьпекі, 2 аддзелы — 1) інфармацыі і грамадзкіх сувязяў, 2) кадраў; 2 цэнтры — 1) інфармацыйны, 2) фізычнай падрыхтоўкі; аркестар, аўтагаспадарку, музэй і штаб;
• 11 тэрытарыяльных падразьдзяленьняў, зь іх 9 управаў у раёнах Менску, а таксама Менскі аддзел унутраных справаў на транспарце і Менскі аддзел унутраных справаў на паветраным транспарце^[4].

Тэрытарыяльныя падразьдзяленьні

На 2021 год ГУУС Менгарвыканкаму налічвала 11 тэрытарыяльных падразьдзяленьняў, у тым ліку Менскі аддзел унутраных справаў на транспарце й Менскі аддзел унутраных справаў на паветраным транспарце, а таксама 9 раённых управаў унутраных справаў Менску: Заводзкую, Кастрычніцкую, Ленінскую, Маскоўскую, Партызанскую, Першамайскую, Савецкую, Фрунзэнскую й Цэнтральную^[4].

Гісторыя

4 сакавіка 1917 году Міхаіл Фрунзэ заснаваў Менскую міліцыю. 6 сакавіку 1917 году ў Менску налічвалася каля 200 міліцыянтаў. Да 15 сакавіка 1917 году стварылі 5 мескіх аддзяленьняў міліцыі, а таксама ўчасткі на чыгуначным вузьле і буйных прадпрыемствах. Пазьней адчынілі Менскую школу міліцыі. 27 сьнежня 1932 году стварылі пашпартную службу. 31 траўня 1935 году ўтварылі інспэкцыю ў справах непаўналетніх. 9 ліпеня 1936 году заснавалі Дзяржаўную аўтамабільную інспэкцыю. 16 траўня 1937 году стварылі службу барацьбы з крадзяжамі сацыялістычнай уласнасьці і спэкуляцыяй (СБКСУС). У верасьні 1969 году ўтварылі Першамайскую РУУС і Цэнтральную РУУС. У красавіку 1977 году стварылі Маскоўскую РУУС і Партызанскую РУУС^[5].

Кіраўнікі

• Іван Кубракоў (28 сакавіка 2019 — 29 кастрычніка 2020)
• Міхаіл Грыб (з 29 кастрычніка 2020)

Санкцыі

31 жніўня 2020 году тагачасны кіраўнік ГУЎС Менгарвыканкаму Іван Кубракоў быў ўключаны ў сьпіс асобаў, на якіх накладзена бестэрміновая забарона на ўезд у Латвію, пяцігадовая забарона на ўезд у Эстонію і забарона на ўезд у Летуву^[6]. 2 кастрычніка 2020 году Іван Кубракоў быў уключаны ў чорны сьпіс Эўразьвязу^[7]. Акрамя таго, Кубракова ў свае санкцыйныя сьпісы ўключылі Канада^[8], Вялікабрытанія^[9], Швайцарыя^[10][11]. Таксама 2 кастрычніка 2020 году ён быў уключаны у сьпіс спэцыяльна вызначаных грамадзянаў і заблякаваных асобаў ЗША^[12].

23 сьнежня 2020 году ГУЎС Менгарвыканкаму за парушэньні правоў чалавека(en), зьвязаныя са здушэньнем беларускіх пратэстаў 2020 году, была ўключана ў санкцыйны сьпіс спэцыяльна вызначаных грамадзянаў і заблякаваных асобаў ЗША^[13][14].

Новы кіраўнік ГУЎС Менгарвыканкаму Міхаіл Грыб летам 2021 году быў уключаны ў санкцыйныя сьпісы ЭЗ^[15], ЗША^[16], Швайцарыі^[17][18].