Касьцёл у Гонар Зьняцьця Збаўцы з Крыжа (Грозаў)

Касьцёл у Го́нар Зьня́цьця Зба́ўцы з Кры́жа — помнік архітэктуры XIX стагодзьдзя ў Грозаве. Знаходзіцца ў цэнтры колішняга мястэчка, на Слуцкай вуліцы. З савецкіх часоў у будынку месьціцца клюб. Твор архітэктуры клясыцызму з рудымэнтамі барока.

Гэтая назва мае некалькі сэнсаў. Калі вас цікавяць іншыя сэнсы, глядзіце таксама Касьцёл у Гонар Зьняцьця Збаўцы з Крыжа (неадназначнасьць).

Помнік сакральнай архітэктуры
Касьцёл у Гонар Зьняцьця Збаўцы з Крыжа
Касьцёл у Гонар Зьняцьця Збаўцы з Крыжа
Краіна	Беларусь
Вёска	Грозаў
Каардынаты	53°10′10.85″ пн. ш. 27°19′54.80″ у. д.
Канфэсія	каталіцтва
Архітэктурны стыль	клясыцызм
Касьцёл у Гонар Зьняцьця Збаўцы з Крыжа на мапе Беларусі Касьцёл у Гонар Зьняцьця Збаўцы з Крыжа
Касьцёл у Гонар Зьняцьця Збаўцы з Крыжа на Вікісховішчы

Перад касьцёлам стаіць крыж у памяць пра Другі Грозаўскі полк Беларускай Народнай Рэспублікі, які браў удзел у Слуцкім збройным чыне ў лістападзе — сьнежні 1920 году.

Гісторыя

Праект маскоўскай перабудовы касьцёла, 1875 г.

Мураваны касьцёл у Грозаве збудавалі ў 1802 годзе на месцы драўлянага. Па здушэньні нацыянальна-вызвольнага паўстаньня (1863—1864) у 1866 годзе расейскія ўлады закрылі касьцёл, а ў 1877 годзе перарабілі яго пад Мікалаеўскую царкву Ўрадавага сыноду Расейскай імпэрыі (Маскоўскай царквы).

У 1962 годзе савецкія ўлады зачынілі царкву. У 1968 годзе былы касьцёл перабудавалі пад клюб і ўправу калгасу.

Архітэктура

Крыж абаронцам БНР

Помнік архітэктуры клясыцызму з рудымэнтамі барока. Гэта 3-нэфавы бязьвежавы з прастакутнай апсыдай аб’ём пад 2-схільным гонтавым дахам. Галоўны фасад завяршае вялікі трыкутны франтон. Роўнічныя фасады аздабляюцца кутнімі пілястрамі.

Унутраная прастора падзялялася шасьцю магутнымі 4-граннымі пілёнамі на тры нэфы, кожны зь якіх заканчваўся алтаром. Малітоўная заля перакрывалася драўлянай стольлю. На хорах месьціўся арган. Направа ад апсыды — закрысьція, пад касьцёлам крыпта.

У выніку маскоўскай перабудовы другой паловы XIX ст. у будынку касьцёла заклалі дзьвярныя і аконныя праёмы, замест якіх прабілі новыя. Разабралі закрысьцію, зрабіўшы рызьніцу пры дапамозе перагародкі, якая падзяліла апсыду на дзьве часткі. Над цэнтральнай часткай паставілі пяць купалоў-цыбулінаў, над уваходам — высокую гранёную званіцу з шатром і купалам-цыбулінай^[1].