Кукута

Ку́кута (па-гішпанску: Cúcuta) — горад у Калюмбіі і цэнтар дэпартамэнту Нортэ-дэ-Сантандэр. Горад разьмешчаны ў аднайменнай даліне ля падножжа Ўсходніх хрыбтоў Калюмбійскіх Андаў на мяжы з Вэнэсуэлай. Насельніцтва гораду складае 777 106 жыхароў, што робіць яго самай густанаселенай гарамой у дэпартамэнце і шостым паводле колькасьці насельніцтва горадам у краіне^[2].

Кукута
Дата заснаваньня:	17 чэрвеня 1733
Краіна:	Калюмбія
Плошча:	1176 км²
Вышыня:	320 м н. у. м.
Насельніцтва:	806 378 чал. (2023)[1]
Геаграфічныя каардынаты:	7°54′27″ пн. ш. 72°30′17″ з. д.
Кукута на мапе Калюмбіі Кукута
Галерэя здымкаў у Вікісховішчы
https://cucuta.gov.co/

Гісторыя

Кукута ў XIX стагодзьдзі.

Кукута першапачаткова была паселішчам дагішпанскай эпохі. У 1550 годзе Пэдра дэ Ўрсуа перадаў яго Сэбастыяну Лярэнца ў якасьці энкам’енды. Хуана Ранхэль дэ Куэльяр заснавала Кукуту 17 чэрвеня 1733 году. Вёска значна пашырылася дзякуючы свайму стратэгічнаму камэрцыйнаму разьмяшчэньню і стала горадам^[3]. У горадзе ладзіўся Кангрэс 1821 году, на якім была зацьверджаная канстытуцыя Кукуты. Гэтая канстытуцыя фактычна стварыла Вялікую Калюмбію, краіну, якая ахоплівала тэрыторыі сучасных Калюмбіі, Вэнэсуэлы, Эквадору і Панамы. Ля Кукуты 28 лютага 1813 году адбылася вырашальная бітва, якая заклала посьпех ваеннай кампаніі Сымона Балівара. 18 траўня 1875 году Кукута была ў значнай ступені зьнішчаная землятрусам. У XIX стагодзьдзі будаўніцтва чыгункі паклала пачатак прамысловай рэвалюцыі. Паўночная лінія будавалася з 1878 па 1888 гады і злучыла Кукуту з Пуэрта-Сантандэрам і Вэнэсуэлай. Будаўніцтва ўсходняй і паўднёвай лініяў таксама пачалося ў 1878 годзе, пры гэтым паўднёвая лінія забясьпечыла злучэньне з Памплёнай і сканчвалася ў Эль-Дыямантэ.

Эканоміка

Фатаздымак Кукуты 2006 году.

Горад вядомы гранічным гандлем і вытворчасьцю. Ягонае разьмяшчэньне на мяжы паміж Калюмбіяй і Вэнэсуэлай дазволіла наладзіць моцныя сувязі з вэнэсуэльскім горадам Сан-Крыстабаль^[4]. Свабодная зона Кукуты ёсьць адной з самых актыўных ня толькі ў краіне, але ўва ўсёй Лацінскай Амэрыцы.

Найбольш разьвітымі галінамі прамысловасьці ёсьць малочная, будаўнічая, тэкстыльная, абутковая і скураная. Горад уважаецца вядучым вытворцам цэмэнту, а ягоная гліняная і каменная прамысловасьць мае найлепшую рэпутацыю ў краіне дзякуючы высокай якасьці. Здабыча вугалю таксама гуляе важную ролю ў мясцовай эканоміцы. Унівэрсытэт Франсіска дэ Паўля Сантандэр у Кукуце ёсьць адной зь нешматлікіх навучальных установаў, якія забясьпечваюць падрыхтоўку горных інжынэраў.