Магілёўская фабрыка марозіва

«Магілёўская фабрыка марозіва» — дзяржаўнае харчовае прадпрыемства Беларусі, заснаванае ў 1957 годзе ў якасьці «Магілёўскага гарадзкога малочнага заводу».

«Магілёўская фабрыка марозіва»
Тып	адкрытае акцыйнае таварыства
Заснаваная	1957 (68 гадоў таму)[1]
Уласьнікі	Магілёўскі аблвыканкам (65%)
Краіна	Беларусь
Разьмяшчэньне	Магілёў
Адрас	Ленінскі раён, вуліца Лазарэнкі, дом 58А[2]
Ключавыя фігуры	Мікалай Шапялевіч (кіраўнік), Пётар Канаплёў (1-ы намесьнік), Яўген Капылоў (галоўны інжынэр)
Галіна	харчовая прамысловасьць
Прадукцыя	марозіва, глязураваны сырок, маянэз, цеста і піца
Абарачэньне	▲17,1 млн рублёў (2018 год[3]; 7,91 млн $)[4]
Апэрацыйны прыбытак	▼588 тыс. рублёў (2018 год; 272 тыс. $)
Чысты прыбытак	▼314 тыс. рублёў (2018 год; 145 тыс. $)
Лік супрацоўнікаў	240 (2020 год)[5]
Матчына кампанія	Міністэрства сельскай гаспадаркі і харчаваньня Беларусі
Аўдытар	«Аўдыт і кіраваньне»
leva.by/be

На 2025 год «МФМ» пераважна вырабляла марозіва, глязураваныя сыркі, тварожныя дэсэрты і замарожанае цеста^[6]. У 2016 годзе стала першым вытворцам цёплага марозіва ў Беларусі.

Вырабы

На 2025 год «Магілёўская фабрыка марозіва» вырабляла:

• 26 найменьняў марозіва, у тым ліку фруктовы лёд і эскімо, двухслойнае і тварожнае, у вафэльных кубках і ражках, а таксама ў буйных пакунках па 200 і 900 грамаў ды вагавае па 2 кг^[7];
• 16 найменьняў тварожных дэсэртаў, у тым ліку 11 найменьняў глязураваных сыркоў тлустасьцю ад 14 да 18 % у пакунках па 40 грамаў^[8];
• 8 найменьняў маянэзу тлустасьцю ад 20 да 67 % у пакунках па 200 і 400 грамаў^[9];
• 4 найменьняў пластовага дражджавога і бездражджавога цеста, а таксама піцу і аснову для яе^[10].

Мінўушчына

У 1957 годзе стварылі «Магілёўскі гарадзкі малочны завод» на вуліцы Лазарэнкі (Беларуская ССР). У 1980 годзе яго пераўтварылі ў цэх марозіва «Магілёўскага малочнага камбінату». 28 сакавіка 1991 году цэх пераўтварылі ў «Магілёўскую фабрыку марозіва». 30 чэрвеня 1995 году Магілёўскі абласны камітэт па кіраваньні дзяржаўнай маёмасьцю і прыватызацыі ўхваліў Загад № 110, якім пераўтварыў прадпрыемства ў адкрытае акцыйнае таварыства. У 1996 годзе запусьцілі ўчастак маянэзу магутнасьцю 800 кг за зьмену. Вытворчая магутнасьць фабрыкі складала 5,7 т марозіва за зьмену^[11].

У 2007 годзе ўвялі ў дзеяньне ўчастак глязураваных сыркоў на палачцы ў выглядзе эскімо. У 2010 годзе ў аддзяленьні падрыхтоўкі сумесі ўсталявалі аўтаматычную мыйную станцыю. У 2011 годзе паставілі лінію фруктовага льду і глязураваных сыркоў на палачцы, а таксама марозіва з сухой вобмешкай. Таксама ўсталявалі лінію фасоўкі марозіва ў вафэльных і полістырольных кубках, эскімо, брыкетах і вафэльных ражках. У траўні 2014 году адкрылі вытворчасьць замарожанага цеста, якая дасягнула звыш 20 найменьняў у выглядзе дражджавога і бездражджавога, паўфабрыкатаў для круасанаў і слоек з начыньнем, асноваў для піцы і самой піцы^[11].

У лістападзе 2016 годзе «Магілёўская фабрыка марозіва» першай у Беларусі пачала вырабляць цёплае марозіва, якое не расставала працяглы час пры пакаёвай тэмпэратуры^[12]. У 2018 годзе вытворчасьць на 62 % складалася з марозіва і на 28 % з глязураваных сыркоў. На пачатак 2019 году фабрыка наймала 244 супрацоўнікаў і на 65 % знаходзілася ва ўласнасьці Магілёўскага абласнога выканаўчага камітэту^[13].

Кіраўнікі

• Тацьцяна Бандарчук (2006 — пасьля 2018)
• Мікалай Шапялевіч (на 2025 год)