Маргарыта Ляўчук

Маргары́та Алякса́ндраўна Ляўчу́к (нар. 16 красавіка 1990, вёска Страдзеч, Берасьцейскі раён Берасьцейскай вобласьці БССР) — беларуская опэрная сьпявачка (сапрана).

Маргарыта Ляўчук
Дата нараджэньня	16 красавіка 1990
Месца нараджэньня	Страдзеч, Берасьцейскі раён, Берасьцейская вобласьць, БССР
Грамадзянства	Беларусь
Месца вучобы	Беларуская дзяржаўная акадэмія музыкі (2016) Берасьцейскі дзяржаўны музычны каледж імя Рыгора Шырмы
Прафэсія	опэрная сьпявачка, акторка
Месца працы	Нацыянальны акадэмічны Вялікі тэатар опэры і балету
Сябра ў	Красная Зелень[d]
Жанры	опэра, джаз, этна
Вакал	сапрана
Узнагароды	Мэдаль Ордэну Пагоні[1]
Маргарыта Ляўчук у Вікісховішчы

Вікіпэдыя мае артыкулы пра іншых асобаў з прозьвішчам Ляўчук.

Жыцьцяпіс

Скончыла Берасьцейскую музычную школу №1, Берасьцейскі музычны коледж імя Рыгора Шырмы па спэцыяльнасьці «Хоравае дырыгенства», у 2016 року — Беларускую дзяржаўную акадэмію музыкі.

З 2012 року зьяўлялася салісткай Музычнага дому «Клясыка». У 2016—2020 роках — салістка Вялікага тэатру Беларусі^[2].

Выступае ў спэктаклях і канцэртах у Беларусі, Летуве, Нямеччыне, Польшчы, Расеі, Францыі^[3]. Як запрошаная артыстка выступае на сцэнах вядучых эўрапейскіх опэрных тэатраў^[4].

У 2020 року брала ўдзел у перадвыбарчай кампаніі Сьвятланы Ціханоўскай. Адказная ў пытаньнях захаваньня культуры і нацыянальнай спадчыны ў камандзе Паўла Латушкі і ў Народным антыкрызісным кіраўніцтве^[5]. Увосені 2020 року зьехала ў Летуву ў сувязі зь перасьледам^[6].

У чэрвені 2024 году стала вядома, што Берасьцейскі абласны суд завочна прысудзіў Ляўчук некалькі гадоў пазбаўленьня волі^[7].

Опэрныя партыі

• «Вясельле Фігара» Вольфганга Амадэя Моцарта — Барбарына
• «Чароўная флейта» Вольфганга Амадэя Моцарта — Царыца ночы
• «Рыгалета» Джузэпэ Вэрдзі — Джыльда
• «Травіята» Джузэпэ Вэрдзі — Віялета
• «Рамэа і Джульета» Шарля Гуно — Джульета
• «Капулеці і Мантэкі» Вінчэнца Бэліні — Джульета
• «Кандыд» Леанарда Бэрнстайна — Кунігунда
• «Verbum Nobile» Станіслава Манюшкі — Зося
• «Казкі Гофмана» Жака Афэнбаха — Алімпія
• «Багема» Джакама Пучыні — Мюзэта

Узнагароды

Фіналістка і ляўрэатка 14 міжнародных вакальных конкурсаў у Беларусі, Гішпаніі, Грузіі, ЗША, Італіі, Летуве, Нямеччыне, Расеі, Эстоніі^[5].

Фіналістка праекту тэлеканалу «Россия К» «Вялікая опэра» (2017)^[8][9].

27 лістапада 2023 году уганараваная Мэдалём Ордэну Пагоні з боку Рады БНР^[1].