Марыя Сапега

Мары́я Крысьці́на Сапе́га (па-польску: Maria Krystyna Sapieha) са Зьдзяхоўскіх гербу «Равіч» (26 красавіка 1910, Сухаволя — 1 красавіка 2009^[2], Польшча) — польская грамадзкая дзяячка, сузаснавальніца і прэзыдэнт фундацыі Ex Animo.

Марыя Сапега

Maria Krystyna Sapieha
Герб «Равіч»
Асабістыя зьвесткі
Імя пры нараджэньні	Марыя Крысьціна Зьдзяхоўская
Нарадзілася	26 красавіка 1910 Сухаволя
Памерла	1 красавіка 2009 (98 гадоў) Польшча
Пахаваная	Вайсковыя могілкі на Павонзках[d]
Род	Зьдзяхоўскія
Бацькі	Ежы Зьдзяхоўскі Марта з Блаўдзевічаў[d][1]
Муж	Ян Андрэй Сапега
Дзеці	Ян Павал (1935) Ежы Андрэй (1937—2010) Яўстахі Пётар (1947—2005)[2]
Дзейнасьць	грамадзкая дзяячка
Рэгаліі
Крыж камандорскі з зоркай ордэна Адраджэньня Польшчы Ордэн Усьмешкі

Жыцьцяпіс

Дачка міністра фінансаў Другой Рэчы Паспалітай Ежы Зьдзяхоўскага, жонка Яна Андрэя Сапегі.

Навучалася ў Вялікабрытаніі і Францыі. У 1937 з мужам пераехала з Скідзелю ў Ружанскую пушчу. У Ружанах Марыя Крысьціна адчыніла дзіцячы садок і школу для дзяўчынак зь бедных сем’яў^[3].

Пасьля бальшавіцкага ўварваньня вымушаная была эміграваць у Летуву, адтуль у Францыю, дзе заангажавалася ў выведную працу на Францускі рэзыстанс^[4], а таксама на заданьне Генэральнага штабу Войска польскага дзейнічала ў Італіі^[4]. Тры гады правяла ў зьняволеньні ў Італіі й Нямеччыне, па вайне пераехала ў Лёндан да мужа і дзяцей.

Пазьней заснавала фундацыю «Дапамога польскім дзецям». У 1980-х роках падтрымлівала «Medical Aid for Poland» і «Polską Macierz Szkolną» ў Ангельшчыне. У 1992 року пераехала ў незалежную Польшчу. Таксама займалася дабрачыннасьцю ў фундацыі «Ex Animo» па дапамозе анкалягічна хворым дзецям^[5].

У 2003 прыяжджала на Беларусь, дзе дапамагала ўзнаўляць ружанскі Траецкі касьцёл^[3].

У 2008 выдала кнігу ўспамінаў «Маё жыцьцё, мой час»^[6].

Узнагароды

• Ордэн Усьмешкі^[7] (9 чэрвеня 2003)^[8]
• Крыж камандорскі з зоркай ордэна Адраджэньня Польшчы (7 красавіка 2009, пасьмяротна)^[9]