Павал Ксавэры Бжастоўскі

Павал Ксавэры Бжастоўскі^[a] (30 сакавіка 1739, Мосар Ашмянскага павету — 17 лістапада 1827, Рукойні каля Вільні) — дзяржаўны і рэлігійны дзяяч Вялікага Княства Літоўскага, мэцэнат. Канонік віленскі (1755—1773), пісар (1762—1774) і рэфэрэндар духоўны вялікі літоўскі (1774—1787), архідыякан віленскі (з 1823)^[2]. Кавалер Ордэна Сьвятога Станіслава (1767)^[3].

Павал Ксавэры Бжастоўскі

Павал Ксавэры Бжастоўскі. Невядомы мастак, сярэдзіна XVIII ст.
Герб «Стрэмя»
Асабістыя зьвесткі
Нарадзіўся	30 сакавіка 1739 Мосар, Ашмянскі павет, Віленскае ваяводзтва, Вялікае Княства Літоўскае
Памёр	17 лістапада 1827 Рукойні, Віленскі павет, Віленская губэрня, Расейская імпэрыя
Род	Бжастоўскія
Бацькі	Юзэф Бжастоўскі Людвіка Садоўская[d]
Дзейнасьць	публіцыст

Біяграфія

Павал Ксавэры Бжастоўскі аб'яўляе Статут сялянам Паўлаўскай рэспублікі. Ф. Смуглевіч, 1795 г.

Паходзіў з шляхецкага роду Бжастоўскіх гербу «Стрэмя», сын Юзэфа. Меў братоў Робэрта і Станіслава.

3 1758 году навучаўся ў Рыме ў Калегіюм Клімэнтынум, сьвятар з 1763 году.

Фінансаваў выданьне кніжак езуіцкай, піярскай і базылянскай друкарнямі ў Вільні. Перакладаў з італьянскай і францускай моваў. Аўтар кнігі «Генэалягічныя паведамленьні пра дом Бжастоўскіх» (на розных мовах, 1776, 1796 і 1818 гады).

У 1767 годзе набыў маёнтак Мерач у Віленскім павеце (перайменаваў яго ў Паўлава), і пад уплывам ідэяў філёзафа-асьветніка Жана-Жака Русо, а таксама сацыялістаў-утапістаў Томаса Мора, Анры Сэн-Сімона ды іншых правёў радыкальныя сацыяльна-эканамічныя рэформы, увёў самакіраваньне сялянаў^[4].

Рэформы апісаў у кнізе «Ўставы для добрага парадку і павіннасьцяў аселых людзей у маёнтку Паўлава ці Мерач, прадпісаныя ў 1771 року» (Вільня, 1771, 2-е выданьне 1791 год), «Лісты ананіма, якія апісваюць камісію вольных паўлаўскіх валашчанаў з сваім дзедзічам, ксяндзом Бжастоўскім, экс-рэфэрэндарам ВКЛ» (бяз даты і месца выданьня).

Па трэцім падзеле Рэчы Паспалітай (1795 год) прадаў Паўлава, жыў у Дрэздэне, Рыме. Па вяртаньні на радзіму быў пробашчам у Рукойнях каля Вільні^[5].

Галерэя

• Іканаграфія Паўла Ксавэрыя Бжастоўскага
• 
  К. Шульцэ, 1794 г.
• 
  Ф. К. Фабрэ, 1797 г.
• 
  Невядомы мастак, 1797 г.
• 
  Невядомы мастак, XIX ст.

Заўвагі

1. Таксама Павал Ксавэр Берастоўскі або Павал Брастоўскі^[1]