Плеяды (зорная скупнасьць)

Плея́ды ці Стажа́р’е^[5] (Мэсье 45) — расьсеяная скупнасьць ў сузор’і Цяльца. Гэта адная з самых бачных і найбліжэйшых да Зямлі расьсеяных зорных скупнасьцяў. Плеяды добра бачныя няўзброеным вокам зімою ў паўночным паўшар’і ды ўлетку ў паўднёвым паўшар’і, але за выняткам Антарктыды і ейных ваколіцаў. Няўзброеным вокам можна разглядзець ад шасьці да дзевяці зорак, а самай яскравай зь іх ёсьць Альцыёна. Плеяды бачныя нават у месцах са значным сьветлавым забруджваньнем^[6]. Агульная колькасьць вядомых зорак у скупнасьці перавышае 600^[7].

Плеяды
Зьвесткі назіраньня (эпоха J2000.0)
Сузор’е	Цялец
Простае ўзьняцьцё	3г 46х 60с[1]
Схіленьне	+24° 07′ 0″[1]
Радыяльная хуткасьць	5,65 ± 0,09 км/с[2]
Адлегласьць	134,4 ± 2,9 парсэк[3]
Бачная зорная велічыня (V)	1,6[4]

Кампутарнае мадэляваньне выявіла, што Плеяды, імаверна, утварыліся з кампактнай канфігурацыі, якая калісьці нагадвала туманнасьць Арыёна^[8]. Астраномы падлічылі, што скупнасьць яшчэ праіснуе прыблізна 250 мільёнаў гадоў, пасьля чаго яно будзе страчанае праз гравітацыйнае ўзаемадзеяньне з галяктычным навакольлем^[9].