Прышцінскі ўнівэрсытэт (Косаўска Мітравіца)

Прышцінскі ўнівэрсытэт (па-сэрбску: Универзитет у Приштини/Univerzitet u Prištini) — афіцыйная назва сэрбскамоўнае ўстановы вышэйшай адукацыі, якая фактычна ўзьнікла пасьля вайны ў Косаве, калі тагачасны Прышцінскі ўнівэрсытэт быў эвакуяваны. Апрача афіцыйнай назвы^[1] выкарыстоўваецца таксама назва Косаўска-Мітравіцкі ўнівэрсытэт, паводле ягонага месцазнаходжаньня з 2001 году.^[2] (некаторыя факультэты знаходзяцца ў іншых грамадах зь перавагаю сэрбскага насельніцтва)

Пра «непадзелены» ўнівэрсытэт, што знаходзіўся ў Прышціне да вайны ў Косаве, глядзіце артыкул Прышцінскі ўнівэрсытэт (да 1999).

Пра ўнівэрсытэт, што фактычна знаходзіцца ў Прышціне, глядзіце артыкул Унівэрсытэт у Прышціне.

Адміністрацыйны корпус

Агульная інфармацыя

Пасьля вайны 1999 году ў Косаве, сэрбская частка выкладнікаў была вымушаная пераехаць да Сэрбіі (такім чынам з 1999 да 2001 году ўнівэрсытэт фактычна знаходзіўся ў Крушаўцы), з 2001 году ўнівэрсытэт (афіцыйна «тымчасова») знаходзіцца ў Косаўскай Мітравіцы (сэрбскамоўнае Паўночнае Косава).

Унівэрсытэт і ягоныя факультэты афіцыйна вядомыя (прызнаныя праз UNMIK ды Эўрапейскую асацыяцыю ўнівэрсытэтаў) пад назваю Унівэрсытэт у Мітравіцы^[3], Урад Сэрбіі прызнае яго за сэрбскую вышэйшую навучальную ўстанову. Унівэрсытэт уваходзіць у Канфэрэнцыю ўнівэрсытэтаў Сэрбіі (KONUS)^[4] і Эўрапейскую асацыяцыю ўнівэрсытэтаў^{[5][6][7][8][9]}. На міжнародным узроўні ўнівэрсытэт супрацоўнічае з балканскімі ўнівэрсытэтамі ды іншымі навучальнымі ўстановамі ва ўсім сьвеце (Францыя, Расея, Італія, Нарвэгія, Аман, Ірляндыя, Злучанае Каралеўства і г. д.).^[10]

Факультэты

• Эканамічны (Косаўска Мітравіца)
• Юрыдычны (Косаўска Мітравіца)
• Мэдыцынскі (Косаўска Мітравіца)
• Настаўніцкі (Лепасавіч)
• Філязофскі (Косаўска Мітравіца)
• Сельскагаспадарчы (Зубін-Потак)
• Прыродна-матэматычны (Косаўска Мітравіца)
• Тэхнічны (Косаўска Мітравіца)
• Мастацтваў (Звэчан)
• Фізычнага выхаваньня (Лепасавіч)