Беларуская рэдакцыя Ватыканскага радыё

Белару́ская рэда́кцыя Ватыка́нскага ра́дыё — беларускамоўная каталіцкая радыёстанцыя, заснаваная ў 1950 годзе ксяндзом Пятром Татарыновічам.

Беларуская праграма Ватыканскага радыё
Краіна	Ватыкан
Пачатак працы	6 студзеня 1950 (75 гадоў таму)
Заснавальнік	Пётар Татарыновіч
Уласьнік	Ватыканскае радыё
Кіраўнікі	Аляксандар Амяльчэня
Сайт	be.radiovaticana.va
Facebook	vaticanradio.by
Он-лайн-трансьляцыя	vaticanradiowebcast.org

Мінуўшчына

Структурная адзінка радыё Ватыкану, заснаванага 12 лютага 1931.

24 сьнежня 1949 року прагучала пасланьне папы Піюса XII па-беларуску з нагоды ўрачыстасьці Божага Нараджэньня і пачатку юбілейнага году хрысьціянства. Рэгулярнае вяшчаньне пачалося 6 студзеня 1950 году^[1]. Першым кіраўніком беларускай службы быў рыма-каталіцкі сьвятар Пётар Татарыновіч, доўгі час ён жа быў адзіным супрацоўнікам радыё.

Першыя перадачы выходзілі адзін раз на тыдзень і складаліся з навінаў Ватыкану, жыцьця Касьцёла і беларускай дыяспары, катэхетычных і апалягетычных разважаньняў. Пазьней з радыё супрацоўнічалі айцец Кастусь Маскалік, біскуп Чэслаў Сіповіч, айцец Тамаш Падзява ды іншыя дзеячы беларускай каталіцкай эміграцыі.

У 1970 годзе Пётар Татарыновіч перадаў паўнамоцтвы кіраўніка Беларускай службы Радыё Ватыкану грэка-каталіцкаму сьвятару Ляву Гарошку. Лік праграмаў за ім вырас да пяці ў тыдзень. Кожны выпуск працягваўся 14 хвілінаў. Акрамя ватыканскіх навінаў, айцец Гарошка засяродзіўся на апалягетыцы і беларускай нацыянальнай тэматыцы. Падрыхтаваў цыклі праграмаў, прысьвечаных хрысьціянскім аспэктам беларускай літаратуры, гісторыі хрысьціянства ў Беларусі, славутым беларускім рэлігійным дзеячам, сьведчаньням вялікіх асобаў — навукоўцаў, астраномаў, кампазытараў — пра існаваньне Бога. У гэтым жа годзе радыё пераехала з Ватыкану ў Палац Піё(it)^[1].

Па Гарошкавай сьмерці ў 1977 року кіраўніком беларускай службы стаў айцец Робэрт Тамушанскі. На радыё ўпершыню зьявіліся супрацоўнікі-несьвятары. У 1980 року Беларускую службу Радыё Ватыкану наведаў папа Ян Павал II. На беларускай мове сталі камэнтавацца ў жывым этэры асобныя ватыканскія падзеі.

У 1996 новым кіраўніком Беларускай службы радыё Ватыкану стаў бэльгійскі езуіт айцец Клёд Рабінэ. У гэты час зьявіліся карэспандэнты радыё ў Беларусі, зьявілася афіцыйная вэб-бачына.

З 2010 року радыё кіруе ксёндз Аляксандар Амяльчэня.

Праграма

Беларуская служба Ватыканскага радыё выходзіць у этэр штодзённа ў 19:00 паводле італьянскага часу (UTC+1:00) на кароткіх хвалях 49 м, частасьць 6185 кГц (зімовы час) альбо 25 м, частасьць 11 715 кГц (летні час). Выпускі цягнуцца 19 хвілінаў. Паўторы адбываюцца наступнага дню ў 11:20 паводле італьянскага часу на УКХ 93,3 МГц (Рым і ваколіцы).

Штонядзелі а 8:55 паводле беларускага часу на хвалях Першай праграмы Беларускага радыё выходзіць пяціхвілінны выніковы выпуск навінаў з Ватыкану, падрыхтаваны Беларускай рэдакцыяй Ватыканскага радыё.

Адпаведныя праграмы можна слухаць таксама праз Інтэрнэт.

Служыць голасам папы рымскага і каталіцкага касьцёлу ў дыялёгу са сьветам. У этэр падаюцца навіны каталіцкага сьвету, асьвятляюцца розныя аспэкты хрысьціянскага жыцьця, абмяркоўваюцца праблемы.