Кастусь Маскалік

Касту́сь Маска́лік (28 траўня 1918, Гарадзея — 12 красавіка 2010, Лёндан) — беларускі грэка-каталіцкі сьвятар.

Канстанцін Маскалік
Род дзейнасьці	сьвятар БГКЦ
Дата нараджэньня	28 траўня 1918
Месца нараджэньня	Гарадзея, Нясьвіскі павет
Дата сьмерці	12 красавіка 2010 (92 гады)
Месца сьмерці	Лёндан, Вялікабрытанія
Месца пахаваньня	Лёнданскія могілкі Сьвятога Панкрата
Грамадзянства	Вялікабрытанія
Занятак	каталіцкі сьвятар
Месца працы	Радыё Ватыкана Беларуская служба
Бацька	Тодар Маскалік
Маці	Ганна Шыманская

Жыцьцяпіс

Канстанцін Маскалік нарадзіўся ў сялянскай сям’і Тодара і Ганны (з роду Шыманскіх) ў заходнебеларускім мястэчку Гарадзея, што недалёка ад Нясьвіжу. Рана застаўся сіратою: маці памерла, калі яму было ўсяго 8 месяцаў, а ў васьмігадовым узросьце памёр і яго бацька. Апеку і выхаваньне над сіратою ўзялі сваякі.

Скончыў сямігодку ў Гарадзеі, потым цягам двух гадоў жыў у Жыровіцкім праваслаўным манастыры. Яшчэ перад вайной гэты вельмі пабожны юнак зацікавіўся грэка-каталіцтвам і некаторы час быў у грэка-каталіцкім манастыры айцоў студытаў ва Уніве каля Львова. У траўні 1941 з роднага Гародзея быў мабілізаваны ў Чырвоную Армію і вывезены ў Расею, але як «ненадзейны» ў хуткім часе апынуўся ў працоўным батальёне.

Як польскі грамадзянін ён здолеў трапіць у Армію Андэрса, разам зь якой праз Іран, Ірак, Палестыну і Эгіпет зрабіў сваеасаблівую пілігрымку ў Сьвятую Зямлю. Урэшце ў 1944 апынуўся ў Італіі. Ганарыўся, што праз усю вайну не забіў аніводнага чалавека і не зрабіў аніводнага стрэлу (працаваў пры кухні).

У 1947 годзе Кастусь Маскалік паступіў у калегію Русікум у Рыме, дзе праходзіў сваю сьвятарскую фармацыю і навучаньне. 10 красавіка 1955 ўкраінскі грэка-каталіцкі архібіскуп Іван Бучко ўдзяліў яму сьвятарскія сьвячаньні.

Праз паўгады а. Кастусь Маскалік прыехаў у Лёндан, дзе служыў у Беларускай каталіцкай місіі ў Лёндане.

Магіла Кастуся Маскаліка ў Лёндане

У 1958 годзе а. Кастусь Маскалік выехаў у Парыж на пасаду кіраўніка Беларускай каталіцкай місіі ў Францыі, аднак у 1962 годзе быў пераведзены ў Рым як памочнік а. Пятра Татарыновіча ў працы на Ватыканскім радыё.

У 1985 айцец Кастусь Маскалік вярнуўся ў Лёндан на працу ў Місіі. Ад 2000 году ён жыў доме састарэлых у Лёндане.

Пахаваны на могілках сьв. Панкрата ў Лёндане, побач з магіламі біскупа Часлава Сіповіч, а. Язэпа Германовіча і іншых беларускіх каталіцкіх сьвятароў.

Вонкавыя спасылкі

• Св. памяці айцец Кастусь Маскалік // Наша Ніва, 13 красавіка 2010
• Ігар Бараноўскі. Адыйшоў да Госпада айцец Кастусь Маскалік // Царква, № 2 (65), 2010