Траінкос

«Траінкос» («ТрэйнКос», анг. train + сэрб. Косово — цягнік Косава) — чыгуначнае прадпрыемства Сэрбіі, заснаванае ў жніўні 2011 году ў Косавым Полі (край Косава і Мятохія).

«Траінкос»
сэрб. „Траинкос”
Тып	акцыйнае таварыства
Заснаваная	16 жніўня 2011 (13 гадоў таму)
Заснавальнікі	урад Косава
Уласьнікі	урад Косава
Краіна	Сэрбія
Разьмяшчэньне	край Косава і Мятохія
Адрас	Косава Поле
Ключавыя фігуры	Етмір Нука (старшыня)[1], Агрон Статоўцы (выканаўчы кіраўнік)[2]
Галіна	сфэра паслугаў
Паслугі	перавозкі чыгункай грузаў і людзей
Абарачэньне	▼1,745 млн эўра (2024 год)[3]
Апэрацыйны прыбытак	▼-435,1 тыс. эўра (2024 год)
Чысты прыбытак	▼-488,6 тыс. эўра (2024 год)
Лік супрацоўнікаў	173 (2024 год)
Матчына кампанія	урад Косава
Аўдытар	«АльбАўдыт» (Урашэвац)
trainkos.com/?lang=sr

На 2025 год утрымліваў чыгуначную сетку ў Косаве і Мятохіі пераважна для грузаперавозак, а таксама для перавозак людзей. Найперш, перавозіў кантэйнэры церазь мяжу з Паўночнай Македоніяй і паяжджанаў у прадмесьцевых зносінах^[4].

Грузаперавозкі

На 2025 год «Траінкос» перавозіў тавары кантэйнэрамі пераважна ад грэцкага порта Тэсалёнікі на Эгейскім моры да чыгуначнага тэрмінала «Добрэва» ў Косавым Полі. Для перавозкі прапаноўвалі 9 відаў кантэйнэраў:

1. 10-футавы;
2. 20-футавы (6,1 м);
3. 30-футавы;
4. 40-футавы;
5. 40-футавы высокакубічны (2,9 м вышынёй);
6. 20-футавы рэфрыжэратарны;
7. 40-футавы рэфрыжэратарны;
8. 40-футавы рэфрыжэратарны высокакубічны;
9. цыстэрну^[5].

Для афармленьня тавараў выкарыстоўвалі тры чыгуначныя мытні і мытную таварню:

1. Генэрал Янкавіч(sr) — працавала кругласоднева на мяжы ў Паўночнай Македоніяй;
2. Горняе Добрэва(sr) — штодня а 8:00—15:00 у грамадзе Косава Поле;
3. Печ(sr) — штодня а 8:00—16:00 на сумежжы з Альбаніяй і Чарнагорыяй;
4. Прышціна — штодня а 8:00—16:00 на складзе славенскага прадпрыемства «Інтэрэўропа»^[6].

Перавозкі людзей

Пасажырскі цягнік у Косаўскай Мітравіцы (2014 год)

На 2025 год «Траінкос» штодня выконваў мясцовыя перавозкі паяжджанаў па маршрутах:

• Прышціна — Печ прадмесьцевым і хуткасным цягнікамі;
• Косава Поле(sr) — Генэрал Янкавіч мясцовым і вольным цягнікамі^[7].

За мяжу ў Паўночную Македонію хадзіў цягнік па маршруце Прышціна — Скоп'е^[7].

Мінуўшчына

Лякаматыў у Косавым Полі (2014 год)

26 лютага 2010 году ўрад Косава ўхваліў Рашэньне № 57110 аб падзеле «Косаўскай чыгункі» (Прышціна). 16 жніўня 2011 году Міністэрства гандлю і прамысловасьці Косава паставіла на ўлік акцыйнае таварыства «Эксплюатацыя цягнікоў Косаўскай чыгункі» (Косава Поле), якое атрымала скарочаную назву «Траінкос» ад анг. train і сэрб. Косово — цягнік Косава^[8].

Па выніках 2024 году «Траінкос» скараціў грузаперавозкі 98-кратна да 1984 тонаў (на 99 %), у тым ліку спынілі перавозкі кантэйнэраў. На вайсковыя перавозкі прыпала 44 % грузаў, на чыгуначныя шляхі для чыгуначных лініяў — 34 %, а рэшта — на пустыя вагоны. Перавозкі паяжджанаў упалі на 2,5 % да 68 743 паездак, але прынесьлі 96 % сукупнай выручкі (1,67 млн эўра). У выніку стратнасьць падвоілася да 28 % (488 тыс. эўра), бо выдаткі на грузаперавозкі 19-кратна перавысілі выручку ад яе^[3]. 30 студзеня 2025 году «Траінкос» абвясьціў пра звальненьне 12 супрацоўнікаў за марнатраўства 230 тыс. эўра праз махлярства з продажамі ў білетных касах^[9].