Тэлекам Армэніі

«Тэлекам Армэніі» — прадпрыемства сувязі Армэніі, заснаванае ў сакавіку 1995 году ў якасьці «Армянскай тэлефоннай кампаніі».

«Тэлекам Армэніі»
арм. «Տելեկոմ Արմենիա»
Тып	адкрытае акцыйнае таварыства
Лістынг на біржы	Армэнія: AMTL
Заснаваная	1 сакавіка 1995 (30 гадоў таму)
Уласьнікі	Айк Есаян і Аляксандар Есаян (па 50%)
Краіна	Армэнія
Разьмяшчэньне	Ерэван
Адрас	Канакер-Зэйтунскі раён, праспэкт Свабоды, дом 24/1
Ключавыя фігуры	Айк Есаян (выканаўчы кіраўнік)[1], Аляксандар Есаян (старшыня)
Галіна	сфэра паслугаў
Паслугі	сотавая сувязь, лічбавае тэлебачаньне, шыракапалоснае Сеціва, фіксаваная тэлефанія
Абарачэньне	▲35,132 млрд драмаў[2] (2024 год; 88,592 млн $)[3]
Апэрацыйны прыбытак	▼2,358 млрд драмаў (2024 год; 5,947 млн $)
Чысты прыбытак	▼1,251 млрд драмаў (2024 год; 3,155 млн $)
Лік супрацоўнікаў	1911 (2023 год)[4]
Матчына кампанія	«Тым»
telecomarmenia.am

На 2025 год аказваў паслугі мабільнага і фіксаванага Сеціва, лічбавага тэлебачаньня, сотавай і фіксаванай тэлефоннай сувязі ў Армэніі. Узьвёў Сетку наступнага пакаленьня хуткасьцю 25 гігабіт/сэкунда з удзелам фінскага прадпрыемства «Нокія», празь якую аказваў паслугі сувязі 330 000 хатнім гаспадаркам. У студзені 2024 году запусьціў міжнародны кабэль з прапускной здольнасьцю звыш 1 тэрабіт/сэкунда, які злучыў Армэнію з Франкфуртам-на-Майне (Нямеччына). Ад 2021 году пастаўляў Сеціва ў 5 краінаў Азіі праз сваю сетку шчыльнага мультыплексаваньня з падзелам даўжыні хвалі (МПДХ). Меў сетку станцыяў хуткай зарадкі электрамабіляў. 12 сьнежня 2023 году «Тэлекам Армэніі» стаў першым прадпрыемствам сувязі Армэніі, якое адкрыта разьмясьціла паі на Армянскай фондавай біржы^[5]. На канец 2024 год налічваў 1,053 млн сотавых абанэнтаў^[6] і 178 тыс. абанэнтаў фіксаванай тэлефоннай сувязі^[7].

Мінуўшчына

1 сакавіка 1995 годзе заснавалі «Армянскую тэлефонную кампанію» («Армян Тэл»), якой Камісія рэгуляваньня грамадзкіх паслугаў Армэніі выдала дазвол № 60 на выкарыстаньне Сеткі грамадзкай электроннай сувязі. У 1996 годзе «Армян Тэл» запусьціла першую ў Армэніі сетку сотавай сувязі 2-га пакаленьня. У 2007 годзе пачалі пастаўляць шыракапалоснае Сеціва праз асымэтрычную лічбавую абанэнцкую лінію (АЛАЛ). У 2008 годзе запусьцілі першую ў Армэніі сотавую сетку 3-га пакаленьня. У 2012-м пачалі прапаноўваць оптавалаконнае злучэньне зь Сецівам^[4].

У 2016 годзе запусьцілі сотавую сетку 4-га пакаленьня. У 2017 годзе прадпрыемства перайменавалі ў «Веон Армэніі». У 2018 годзе укаранілі звышвысакахуткасную лічбавую абанэнцкую лінію (ЗЛАЛ), што дазволіла пастаўляць інтэрнэт-тэлебачаньне. У кастрычніку 2020 году ЗАТ «Тым», якое заснавалі Айк і Аляксандар Есаяны, выкупіла «Веон Армэніі», які перайменавалі ў «Тэлекам Армэніі». У 2021 годзе пачалі ўзводзіць пасіўную оптавалаконную Сетку наступнага пакаленьня з хуткасьцю злучэньня 25 гігабіт/сэкунда. Таксама ў 2021 годзе пачалі аказваць паслугі перасылкі дадзеных з Азіі ў Эўропу празь оптавалаконную сетку ЗЛАЛ^[4].

У 2022 годзе сумарная выручка прадпрыемства склала 34,6 млрд драмаў (87,9 млн $), зь якіх 47 % прыпала на сотавую сувязь, 42 % — на фіксаваную сувязь і 9 % — на продаж абсталяваньня. За 2022 год лік сотавых абанэнтаў вырас на 5 % да 958 тыс., якія складалі 25 % сотавых абанэнтаў у Армэніі. У выніку прадпрыемства займала 2-е месца паводле іх ліку ў краіне. Лік фіксаваных абанэнтаў скараціўся на 11 % да 326 тыс. за кошт скарачэньня ліку тэлефонных абанэнтаў. На рынку шыракапалоснага Сеціва прадпрыемства мела долю ў 33 % і займала 2-е месца. У 2023 годзе «Тэлекам Армэніі» набыў права на радыёчастасьці ў 700 і 1800 мэгагэрцаў, што паспрыяла атрыманьню дазволу на карыстаньне радыёчастасьцямі на 40 і 10 мэгагэрцаў для пашырэньня сотавай сеткі 4-га пакаленьня^[4]. 12 сьнежня 2023 году «Тэлекам Армэніі» стаў першым прадпрыемствам сувязі Армэніі, якое адкрыта разьмясьціла паі коштам 45 млн даляраў на Армянскай фондавай біржы. Пайшчыкамі сталі Міжнародная фінансавая карпарацыя (ЗША), Эўрапейскі банк рэканструкцыі і разьвіцьця (Ангельшчына) і «Амэрыябанк».