Царква Сьвятога Духа (Талін)

Царква́ Сьвято́га Ду́ха (па-эстонску: Pühavaimu kirik) — лютаранская царква, якая знаходзіцца ў гістарычным цэнтры Таліну, побач з ратушай. Найменшая сярэднявечная царква Таліну^[1], помнік сярэднявечнай архітэктуры.

Славутасьць
Царква Сьвятога Духа Püha Vaimu kirik
Краіна	Эстонія
Места	Талін
Каардынаты	59°26′17″ пн. ш. 24°44′45″ у. д.
Канфэсія	лютаранства
Тып будынка	царква
Архітэктурны стыль	готыка
Дата заснаваньня	пачатак XIII стагодзьдзя
Будаваньне	???—XIV стагодзьдзе
Статус	ахоўваецца дзяржавай
Стан	дзейны
Сайт	Афіцыйны сайт
Царква Сьвятога Духа на мапе Эстоніі Царква Сьвятога Духа
Царква Сьвятога Духа на Вікісховішчы

Гэтая назва мае некалькі сэнсаў. Калі вас цікавяць іншыя сэнсы, глядзіце таксама Царква Сьвятога Духа.

Мінуўшчына

Першапачатковы будынак быў закладзены на пачатку XIII стагодзьдзя. Да нашага часу дайшоў двухнэфавы будынак, узьведзены ў XIV стагодзьдзі. Пабудова разам з васьміграннай кансольнай вежай была скончаная, імаверна, да 1380 року^[2].

У 1630-я гатычны шпіль вежы быў заменены ківерам у стылі паўночнага Адраджэньня, падобным да ківеру суседняе ратушы. Да нядаўнае пары на вежы царквы знаходзіўся найстарэйшы звон у Таліне, адліты ў 1433 року^[2] (раскалоўся падчас пажару ў 2003 року^[3]). У 1688 дададзены флюгер, створаны Д. Хюбэнэрам.

З царквой зьвязаная памяць пра двух пастараў XVI стагодзьдзя, якія ўнесьлі значны ўнёсак у культуру Эстоніі:

• Ёган Коэл, перакладнік катэхізісу на эстонскую мову
• Бальтазар Русаў, аўтар «Хронікі Лівонскай правінцыі(et)»

Цяпер належыць Эстонскай эвангельска-лютаранскай царкве.

Архітэктура

Двухнэфавы прастакутны ў пляне будынак. Унутраная прастора падзеленая на дзьве часткі цэнтральнай лініяй слупоў.

У заходняй частцы будынку — стройная васьмігранная кансольная вежа ў стылі Тэўтонскага ордэну.

На паўночным фасадзе знаходзіцца разьбяны гадзіньнік у барокавым стылі, створаны ў 1684 Крыстыянам Акерманам.

Інтэр’ер

Інтэр’ер царквы

Простыя крыжовыя скляпеньні ўнутранае прасторы абапіраюцца на чатыры квадратныя слупы. Алтарная частка разьмешчаная асымэтрычна, зьяўляючыся працягам паўночнага нэфу.

• сярэднявечны гатычны разны алтар з выявай сашэсьця Сьвятога Духа (1483)
• рэнэсансная катэдра (1597)
• люстры і бра ў стылі Адраджэньня і барока
• маляўнічыя эпітафіі ў барокавым стылі