Часлаў Ханяўка

Часлаў Ханяўка (нар. 26 траўня 1909, Рыга — † 2 ліпеня 1988, Саўт-Рывер) — беларускі палітычны й грамадзкі дзеяч.

Часлаў Ханяўка
Род дзейнасьці	палітык
Дата нараджэньня	26 траўня 1909
Месца нараджэньня	Рыга, Латвія
Дата сьмерці	2 ліпеня 1988
Месца сьмерці	Саўт-Рывер, ЗША
Месца пахаваньня	Беларускія могілкі ў Іст-Брансўіку
Месца вучобы	Віленская беларуская гімназія Віленскі ўнівэрсытэт
Сябра ў	Беларускі камітэт[d], Беларускі камітэт[d] і Беларускі камітэт

Біяграфія

Нарадзіўся 26 траўня 1909 году ў Рызе ў Казімера Іванавіча Ханяўкі й яго жонкі Алены, народжанай Каранько. Сямʼя паходзіла з Будслава. 7 чэрвеня таго ж году быў ахрышчаны ў Рыскім парафіяльным касьцёле кс. Довгялловичам. Хроснымі сталі Эдвард Будзька і Аляксандра Гульбінская^[1]. Стрыечны брат Вінцэнта Жук-Грышкевіча.

Скончыў Віленскую беларускую гімназію і агранамічны факультэт Віленскага ўнівэрсытэту. Пад час вучобы ва ўнівэрсытэце быў сябрам Беларускага студэнцкага саюзу й закладнікам студэнцкай карпарацыі Скарынія, дзе абіраўся сакратаром праўленьня ў 1931 годзе^[2] й намесьнікам старшыні ў 1933 годзе^[3].

У Другую сусьветную вайну ў 1939 годзе ў Вільні разам зь іншымі беларускімі дзеячамі заснаваў Беларускую незалежніцкую партыю, паводле Вацлава Пануцэвіча, быў адным зь ініцыятараў заснаваньня партыі. У 1940 годзе разам з Вінцэнтам Гадлеўскім, перабіраецца ў Варшаву. Падчас нямецкай акупацыі дзейнічаў у Беларускім камітэце ў Беластоку і Беларускім камітэце ў Варшаве^[4].

З пачатку 1950-х жыў у ЗША ў Саўт-Рыверы. Актыўна дзейнічаў у беларускім асяродзьдзі. 16 сьнежня 1951 году ўдзельнічаў у першым паседжаньні ініцыятыўнай групы па стварэньні Беларускага інстытуту навукі й мастацтва ў Нью-Ёрку^[5].

Зьяўляўся адным з кіраўнікоў арганізацыі «Беларуска-амэрыканская дапамога» ў Нью-Ёрку, створанай з ініцыятывы Беларуска-амэрыканскага задзіночаньня^[6]. У 1962 годзе цяжка захварэў, пра гэта прэзыдэнт Рады БНР Вінцэнт Жук-Грышкевіч пісаў так: «Шкада, што Чэсь пісаць ня можа, бо пісаць ён мог і мае аб чым...»^[4].

З жонкай Марыяй (1910—2005) — арганізатар і ўдзельніца беларускіх сустрэч і мерапрыемстваў у Амэрыцы. Пахаваная побач з мужам на беларускіх могільніках Жыровіцкай Божай Маці ў Іст-Брансьвіку (ЗША) — меў дачку Рагнеду.

Памёр 2 ліпеня 1988 году ў Саўт-Рыверы ЗША. Пахаваны на беларускіх могілках Жыровіцкай Божай Маці ў Іст-Брансьвіку (ЗША).