Казімер Пац

Казімер Пац (? — 1695) — рымска-каталіцкі й дзяржаўны дзяяч Вялікага Княства Літоўскага. Сакратар каралеўскі (ад 1650), біскуп смаленскі (1664—1667) і жамойцкі (ад 1668).

Казімер Пац

К. Пац. Невядомы мастак, XVII ст.
Герб «Газдава»
Асабістыя зьвесткі
Памёр	1695[1][2][3]
Род	Пацы
Бацькі	Пётар Пац[4][5] Гальшка Шэмет[d][4][5]
Дзейнасьць	каталіцкі сьвятар, каталіцкі біскуп

Біяграфія

Прадстаўнік шляхецкага роду Пацаў гербу «Газдава», сын Пятра і Гальшкі з Шэмэтаў. Меў брата Міхала Казімера.

Навучаўся ў Вільні, ужо тады надумаў прысьвяціць сябе духоўнай кар’еры. Пробашч слонімскі ад 1643, беластоцкі й кусташ пільтынскі ад 1654, канонік віленскі ад 1657.

У вайну Маскоўскай дзяржавы з Рэччу Паспалітай трапіў у палон, па вызваленьні зь якога ў 1662 зрабіўся пробашчам віленскім і геранёнскім.

Актыўна ўдзельнічаў у публічным жыцьці, браў удзел у соймах. Неаднаразова быў кандыдатам у біскупы віленскія, аднак ня здолеў атрымаць неабходную падтрымку ў зьвязку з памяншэньнем вагі Пацаў у Вялікім Княстве Літоўскім.