Чакавец

Чакавец
Герб	Сцяг
Краіна	Харватыя
Жупанія	Меджымурская жупанія
Каардынаты	46°23′00″ пн. ш. 16°26′00″ у. д.HGЯO
Мэр	Бранка Шаламан (СДП)
Першая згадка	1328
Горад з	1579
Плошча	76,9 км²; 16,8 км²;
Вышыня цэнтра	156 м
Насельніцтва	15 790 чалавек (2001)
Часавы пояс	UTC+1, летам UTC+2
Тэлефонны код	+385 40
Паштовы індэкс	40000
Аўтамабільны код	ČK
Афіцыйны сайт	cakovec.hr (харв.)
	Медыяфайлы на Вікісховішчы

Ча́кавец (харв.: Čakovec) — горад у Харватыі, у паўночнай частцы краіны. Адміністрацыйны цэнтр і найбуйнейшы горад Меджымурскай жупаніі. Насельніцтва — 15 790 чалавек (2001).

Хуткія факты Краіна, Жупанія ...

Закрыць

Чакавец размешчаны ў самым паўночным рэгіёне краіне — міжрэччы рэк Дравы і Муры, вядомым як Меджымур'е. Другі з самых паўночных гарадоў краіны пасля горада Мурска-Срэдзішчэ.

За 7 кіламетраў на захад і за 20 кіламетраў на поўнач ад горада праходзіць граніца са Славеніяй, за 20 кіламетраў на ўсход — граніца з Венгрыяй.

За 12 кіламетраў на поўдзень ад Чакаўца знаходзіцца горад Вараждзін, за 15 кіламетраў на поўнач — Мурска-Срэдзішчэ.

Праз горад праходзіць аўтамабільная шаша, якая вядзе з Венгрыі ў Вараждзін і Заграб, а таксама некалькі чыгунак, што вядуць у суседнія гарады Харватыі, Венгрыі і Славеніі. У трох кіламетрах ад горада знаходзіцца невялікі аэрапорт, здольны прымаць малыя самалёты.

У рымскія часы на месцы сучаснага горада размяшчаўся ўмацаваны лагер Акуама.

Упершыню пад сваёй сучаснай назвай горад згаданы ў 1328 годзе. Назва паходзіць ад прозвішча венгерскага князя Дзмітрыя Чакі, які пабудаваў у XIII стагоддзі драўляную вежу, што атрымала яго імя, якое затым перайшло на ўвесь горад.

У 1466 годзе ўлада над горадам перайшла да знатнага княжацкага роду Зрынскіх, пасля чаго Чакавец пачаў бурна развівацца. У 1579 годзе Чакавец атрымаў гарадскія прывілеі.

У 1738 годзе горад быў разбураны землетрасеннем, а ў 1741 годзе пацярпеў ад вялікага пажару. У 1848 годзе быў далучаны да Харватыі, якая мела аўтаномію ў складзе Аўстра-Венгрыі.

Пасля Першай сусветнай вайны разам з усёй Харватыяй Чакавец увайшоў у склад Каралеўства сербаў, харватаў і славенцаў, а пазней — у склад Югаславіі. У 1941—1945 гадах быў акупаваны венгерскай арміяй. З 1991 года — у складзе незалежнай Харватыі.

Паводле перапісу 2001 года насельніцтва горада складае 15 790 чалавек, разам з прыгарадамі насельніцтва агламерацыі — 30 455 чалавек. Пераважная большасць насельніцтва — харваты (93 %), самай буйной нацыянальнай меншасцю з'яўляюцца цыгане — 3,6 %.

Чакавец — развіты індустрыяльны горад. Галоўныя галіны прамысловасці — вытворчасць тэкстылю, абутку, металаапрацоўка, паліграфія, харчовая і хімічная прамысловасць.

Замак Зрынскіх — добра захаваны замак сям'і Зрынскіх. Цяпер у ім размешчаны музей Меджымур'я.
Сецэсійны палац — палац у стылі венскага сецэсіёну.
Храм Св. Мікалая.