Іосіф Антонавіч Парфіяновіч

Іосіф Антонавіч Парфіяно́віч (4 верасня 1902 — 4 жніўня 1993) — вучоны-фізік, заснавальнік навуковай школы па люмінесцэнцыі і радыяцыйнай фізіцы. Доктар фізіка-матэматычных навук (1958), прафесар (1960). Заслужаны дзеяч навукі РСФСР (1970).

Іосіф Антонавіч Парфіяновіч
Дата нараджэння	4 верасня 1902(1902-09-04)
Месца нараджэння	Лепель, Лепельскі павет, Віцебская губерня, Расійская імперыя
Дата смерці	4 жніўня 1993(1993-08-04) (90 гадоў)
Грамадзянства	СССР
Род дзейнасці	фізік, палітык
Месца працы	Іркуцкі дзяржаўны ўніверсітэт[d]
Навуковая ступень	доктар фізіка-матэматычных навук (1958)
Навуковае званне	прафесар[d] (1960)
Альма-матар	Іркуцкі дзяржаўны ўніверсітэт[d] (1926)
Узнагароды

Біяграфія

І. А. Парфіяновіч нарадзіўся ў горадзе Лепель Віцебскай губерні (зараз Віцебская вобласць).

З 1917 года жыве ў Іркуцку. У 1921 годзе скончыў школу і паступіў вучыцца ў Політэхнічны практычны інстытут. У 1923 годзе пераведзены на 2-і курс у Іркуцкі дзяржаўны ўніверсітэт, які скончыў у 1926 годзе і застаўся ў ім працаваць (асістэнт кафедры фізікі, аспірант па кафедры агульнай і тэарэтычнай фізікі). З 1930 года прызначаны дацэнтам і загадчыкам кафедры фізікі, з 1 кастрычніка 1931 года загадчыкам фізічнага аддзялення ўніверсітэта, з 1933 года дэканам фізіка-матэматычнага факультэта. У 1931—1949 гадах І. А. Парфіяновіч выконваў абавязкі прафесара кафедры фізікі, у 1960 г. зацверджаны ў званні прафесара кафедры фізікі. У 1974—1986 гадах — дырэктар НДІ прыкладной фізікі пры ІДУ.

У 1953 годзе І. А. Парфіяновіч узнагароджаны ордэнам Леніна.

Навуковая дзейнасць

І. А. Парфіяновічу належаць навуковыя працы ў галіне люмінесцэнцыі крышталічных рэчываў. Ён даследаваў люмінесцэнцыю і цэнтры афарбоўкі ў шчолачна-галоідных фосфарах, прыроду лакальных станаў у іонных крышталях, тэрма-, фотастымуляваную і рэнтгеналюмінесцэнцыю, дазіметрычныя ўласцівасці монакрышталёў. У 1958 годзе на Вучоным савеце Маскоўскага дзяржаўнага ўніверсітэта абараніў доктарскую дысертацыю «Люмінесцэнцыя і цэнтры афарбоўкі шчолачна-галоідных фосфараў, узбуджаных рэнтгенаўскімі праменямі»^[1].

Сярод апублікованых прац:

• «Электронные центры окраски в ионных кристаллах» (Іркуцк, 1977. Разам з І. І. Пензінай);
• «Люминесценция кристаллов» (Іркуцк, 1988. Разам з У. М. Саламатавым).

Зноскі

1. Парфианович Иосиф Антонович Архівавана 26 кастрычніка 2007. // Сайт Фізічнага факультэта Іркуцкага дзяржаўнага ўніверсітэта (руск.)