Алег Буткевіч

Алег Чэслававіч Буткевіч (18 сакавіка 1972, Браслаў, Віцебская вобласць) — беларускі рымска-каталіцкі дзеяч, Біскуп Віцебскі (з 2013 года). Старшыня Канферэнцыі Каталіцкіх Біскупаў Беларусі (з 14 красавіка 2021 года)^[1].

Алег Буткевіч
Біскуп віцебскі з 29 лістапада 2013 года
Царква	Рымска-Каталіцкая Царква
Папярэднік	Уладзіслаў Блін
4-ы Старшыня Канферэнцыі каталіцкіх біскупаў Беларусі з 14 красавіка 2021
Царква	Каталіцкая царква
Папярэднік	Тадэвуш Кандрусевіч
Адукацыя	БДАТУ Гродзенская вышэйшая духоўная семінарыя
Дзейнасць	каталіцкі святар, каталіцкі біскуп
Нараджэнне	18 сакавіка 1972(1972-03-18) (53 гады) Браслаў, Браслаўскі раён, Віцебская вобласць, Беларуская ССР, СССР
Прыняцце свяшчэннага сану	13 мая 2000
Медыяфайлы на Вікісховішчы

У Вікіпедыі ёсць артыкулы пра іншых людзей з прозвішчам Буткевіч.

Біяграфія

Нарадзіўся 18 сакавіка 1972 года ў Браславе. Бацька, Чэслаў Буткевіч, быў шматгадовым старшынёй браслаўскай парафіяльнай рады^[2].

Скончыў Беларускі дзяржаўны аграрны тэхнічны ўніверсітэт па спецыяльнасці інжынер-механік^[3]. Падчас вучобы ў Мінску наведваў службы свайго земляка, кс. Міхала Сапеля^[4]. Затым паступіў у Вышэйшую духоўную семінарыю ў Гродне (1994). Яго духоўнымі айцамі ў семінарыі былі кс. Міхал Варанецкі, кс. Тадэвуш Вышыньскі, кс. Ежы Лявінскі. «Гледзячы на гэтых людзей я разумеў, што хрысціянства і служэнне Богу вартыя таго каб прысвяціць гэтаму жыццё», — згадвае сваіх духоўнікаў біскуп Буткевіч^[4]. Прэсвітарскае пасвячэнне прыняў 13 мая 2000 года; прасвітар Віцебскай дыяцэзіі. Выконваў абавязкі вікарыя парафіі ў Наваполацку і Мёрах, абавязкі пробашча парафіі ў Бешанковічах і Уле. З 2003 года выконвае абавязкі пробашча парафіі Святога Антонія Падуанскага ў Віцебску і Віцебскага дэкана.

29 лістапада 2013 года прызначаны біскупам Віцебскай дыяцэзіі. Біскупскае пасвячэнне здзейсніў апостальскі нунцый у Беларусі Клаўдзіа Гуджэроці 18 студзеня 2014 года.

3 чэрвеня 2015 года Канферэнцыя Каталіцкіх Біскупаў Беларусі абрала біскупа Алега Буткевіча сваім віцэ-старшынёй. 14 красавіка 2021 года ён быў абраны старшынёй Канферэнцыі Каталіцкіх Біскупаў Беларусі.

Погляды

12 жніўня 2020 года, у час гвалтоўных разгонаў пратэстаў супраць фальсіфікацыі прэзідэнцкіх выбараў, выступіў са зваротам, дзе сярод іншага заявіў^[5]:

Пабудаваныя на крыві сістэмы ў гісторыі ніколі не былі трывалымі, а Справядлівасць заўсёды вяртала здзейсненае тым, хто пераступаў усялякія людскія (не кажучы ўжо пра Божыя) нормы.

У гэтым жа звароце віцебскі біскуп напісаў^[6]:

Наша краіна перажывае не самы лёгкі час сваёй гісторыі. Чарговыя выбары выклікалі ў нашым грамадстве крызіс, у які выліліся напружанасць перадвыбарчай кампаніі і, усё ж такі, не цалкам карэктны падлік галасоў.

Сям’я

Мае дзвюх малодшых сясцёр Алу і Ганну — абедзве манашкі-еўхарысткі^[7].

Зноскі

1. Абраны новы старшыня Канферэнцыі Каталіцкіх Біскупаў у Беларусі
2. У Браславе развіталіся з Чэславам Буткевічам — татам біскупа Алега і сясцёр Алы і Ганны, эўхарыстак
3. Епископ Олег Буткевич(нявызн.). Праверана 19 сакавіка 2024.
4. Голас паклікання. Біскуп Алег Буткевіч(нявызн.). Праверана 19 сакавіка 2024.
5. Каталіцкі біскуп Віцебска: Пабудаваныя на крыві сістэмы ў гісторыі ніколі не былі трывалымі
6. редактар. Зварот Біскупа Віцебскага Алега Буткевіча з нагоды масавых пратэстаў у краіне (руск.)  (нявызн.) ?(недаступная спасылка). Віцебская дыяцэзія рыма-каталіцкага касцёла ў Беларусі (19 жніўня 2020). Архівавана з першакрыніцы 19 сакавіка 2024. Праверана 19 сакавіка 2024.
7. Папа Францішак прызначыў трох маладых біскупаў-беларусаў. У біскупа Віцебскага і абедзве сястры — манашкі