Альпійская балада (балет)

Альпійская балада — аднаактовы балет Яўгена Глебава, пастаўлены ў 1967 годзе Беларускім дзяржаўным тэтрам оперы і балета^[1][2] пад кіраўніцтвам дырыжора Г. Н. Дугашава.

Альпійская балада
Жанр	балет
Заснаваны на	аднайменнай аповесці Васіля быкава
Аўтар	лібрэта Раіса Чарахоўская
Кампазітар	Яўген Глебаў
Дырыжор	Раіса Львоўна Чарахоўская
Харэограф	Атар Дадышкіліяні
Акцёры	гл. тэкст
Краіна	БССР
Год	1967
Пастаноўкі	прэм'ера 7 чэрвеня 1967 года

Гісторыя стварэння

Балет заснаваны на аднайменнай аповесці Васіля Быкава.

Лібрэта было напісана вядомай балерынай і педагогам Раісай Чарахоўскай. Спачатку Васіль Быкаў не пагаджаўся на прапановы стварыць балет па матывах яго аповесці, пакуль Раіса Чарахоўская асабіста не прыехала да яго ў гасцініцу і не ўгаварыла. Пазней Быкаў быў вельмі задаволены балетам, а Яўген Глебаў стаў адным з яго сяброў^[3].

У 1966-м Глебаў стварыў партытуру. А ў наступным годзе балет быў увасоблены на акадэмічнай сцэне харэографам Атарам Дадышкіліяні^[1].

Пастаноўка распавядае пра Джулію і Івана, якія ў час Вялікай Айчыннай вайны збягаюць з канцлагера^[1].

Сцэнаграфіяй займаўся мастак Яўген Чамадураў^[1].

Акцёры

• Джулія — Вольга Лапо, Клара Малышава, Аляўціна Карзянкова, Марына Пятрова, Людміла Цярэнцьева
• Іван Цярэшка — Віктар Саркісьян, Леанід Чахоўскі, Мікалай Грышчанка і Сяргей Пясцехін

Іншыя пастаноўкі

У 1972 годзе ставіўся харэографам Атарам Дадзішкіліяні ў Чэлябінскім тэатры оперы і балета  (руск.)^[2].

Уплыў на культуру

Пасля стварэння балету Яўген Глебаў на яго ж аснове стварыў «Сюіту з балета „Альпійская балада“».

Спектакль магутна прагучаў на сваіх першых паказах, а потым «пражыў» доўгае і шчаслівае «жыццё»^[1]. Рэдка здараецца, каб нацыянальны балетны твор не адно дзесяцігоддзе трымаўся на сцэне і прайшоў больш за 100 разоў^[1].

Узнагароды

У 1968 годзе музыка балета «Альпійская балада» ўдастоена другой прэміі і звання лаўрэата (першая прэмія не прысуджалася) Усесаюзнага конкурсу на стварэнне новых музычных спектакляў у адзначэнне 50-годдзя Кастрычніцкай рэвалюцыі 1917 года^[4].

Зноскі

1. Трагічная экспрэсія «Балады…» (нявызн.)(недаступная спасылка). Архівавана з першакрыніцы 21 студзеня 2021. Праверана 20 лютага 2014.
2. Альпийская баллада. Балет. Энциклопедия, СЭ, 1981 Архівавана 29 студзеня 2021. (руск.)
3. Быков В. Долгая дорога домой. — М.: АСТ; Мн.: Харвест, 2005. — С. 216.
4. Творческий портрет Архівавана 24 верасня 2014. (руск.)