Аляксандр Валянцінавіч Старцаў

У Вікіпедыі ёсць артыкулы пра іншых людзей з прозвішчам Старцаў.

Аляксандр Валянцінавіч Ста́рцаў^[1] (руск.: Александр Валентинович Старцев); 25 сакавіка 1946) — вучоны ў галіне тэхнічнай кібернетыкі і інфарматыкі, лаўрэат Дзяржаўнай прэміі СССР (1985).

Аляксандр Валянцінавіч Старцаў
Дата нараджэння	25 сакавіка 1946(1946-03-25) (79 гадоў)
Месца нараджэння	Хабараўскі край, РСФСР, СССР
Грамадзянства	СССР  Беларусь
Род дзейнасці	навуковец
Навуковая сфера	тэхнічная кібернетыка і інфарматыка
Месца працы	Інстытут тэхнічнай кібернетыкі АН БССР Беларусбанк
Альма-матар	Мінскі радыётэхнічны інстытут
Прэміі
Узнагароды

Біяграфія

Нарадзіўся ў сяле Кіраўскае (Хабараўскі край Расіі)^[1]. У 1964 годзе скончыў сярэднюю школу ў гарадскім пасёлку Мачулішчы Мінскага раёна^[2], у 1969 годзе — факультэт аўтаматыкі і вылічальнай тэхнікі^[2] Мінскага радыётэхнічнага інстытута. З 1969 года працаваў інжынерам ў Навукова-даследчым інстытуце сродкаў аўтаматызацыі^[2]. У 1976 года А. В. Старцаў у Інстытуце тэхнічнай кібернетыкі Акадэміі навук БССР: загадчык сектара, з 1979 года — загадчык аддзела, з 1988 — інжынер, з 1989 — старшы навуковы супрацоўнік лабараторыі апрацоўкі і распазнавання відарысаў^[2]. У 1983 годзе скончыў завочную аспірантуру пры Інстытуце тэхнічнай кібернетыкі. З 1993 года займаў пасаду начальніка аддзела ў ЗАТ «БелКамДата», з 1997 года начальніка галоўнага ўпраўлення канцэрна «Белрэсурсы». З 2003 года — галоўны спецыяліст інфармацыйна-аналітычнага аддзела ААТ Ашчадны банк «Беларусбанк»^[2].

Навуковая дзейнасць

Аўтар прац па інфармацыйна-праграмным забеспячэнні аўтаматызаваных сістэм, спецыялізаваных графічных комплексаў, сістэм аўтаматызаванага ўвода і апрацоўкі картаграфічнай інфармацыі. Распрацаваў структуру і тэхналогію апрацоўкі малюнкаў на шматкарыстальніцкім аўтаматызаваным рабочым месцы картографа, метады класіфікацыі элементаў картаграфічнага малюнка пры яго ўводзе і фарміраванні лічбавых тапаграфічных карт^[2].

Сярод апублікаванага:

• Подход к моделированию и классификации банка картографических данных // Геодезия и картография. 1992. № 8. — С. 48—52. (разам з В. В. Старовойтавым);
• Использование Objectivity/DB для создания объектно-ориентированной базы данных по субмодулям TILE-калориметра проекта Atlas / М. А. Назаренко, Э. Г. Никонов, А. В. Старцев. — Дубна, 2000;
• Контроль параметров маркированного объекта на основе принципов адаптивной аутентификации / В. И. Дравица, А. В. Решетняк, А. В. Старцев // Новости науки и технологий. — 2022. — № 1. — С. 37.

Узнагароды

• Дзяржаўная прэмія СССР (1985).
• Медаль «За працоўную доблесць» (1981)
• Сярэбраны медаль ВДНГ СССР (1986)

Зноскі

1. БелЭн 2002.
2. Старцев Александр Валентинович (руск.) // Музей АІПІ НАН Беларусі