Анатоль Анатолевіч Котаў

У Вікіпедыі ёсць артыкулы пра іншых людзей з прозвішчам Котаў.

Анатоль Анатолевіч Котаў (нар. 18 чэрвеня 1980, Мінск) — беларускі дыпламат і грамадскі дзеяч.

Анатоль Анатолевіч Котаў
Нараджэнне	1980 Мінск, Беларуская ССР, СССР
Член у	Народнае антыкрызіснае кіраванне Нацыянальны савет аб'яднаных дэмакратычных сіл Беларусі[d][1][2]
Адукацыя	Маскоўскі дзяржаўны інстытут міжнародных адносін
Месца працы	Пасольства Беларусі ў Польшчы Міністэрства замежных спраў Рэспублікі Беларусь Нацыянальны алімпійскі камітэт Рэспублікі Беларусь

Біяграфія

Нарадзіўся 18 чэрвеня 1980 года ў Мінску.

У 2002 годзе скончыў Маскоўскі дзяржаўны інстытут міжнародных адносін.

У 2002—2006 гадах — трэці, затым — другі сакратар галоўнага дагаворна-прававога ўпраўлення Міністэрства замежных спраў Рэспублікі Беларусь. У 2006—2010 гадах — трэці, другі сакратар Пасольства Рэспублікі Беларусь у Рэспубліцы Польшча. З 2010 года — галоўны саветнік, з 2014 года — старшы саветнік Пасольства Рэспублікі Беларусь у Рэспубліцы Польшча.

З 2015 года — вядучы спецыяліст Нацыянальнага алімпійскага камітэта Рэспублікі Беларусь, генеральны сакратар НАК^[3]. Намеснік дырэктара фонду «Дырэкцыя ІІ Еўрапейскіх гульняў 2019 года»^[4].

Працаваў намеснікам загадчыка аддзела фінансавання дзяржаўных органаў галоўнага фінансавага ўпраўлення Упраўлення справамі Прэзідэнта Рэспублікі Беларусь, 18 жніўня 2020 года звольніўся з пасады на знак пратэсту пасля прэзідэнцкіх выбараў у Беларусі і жорсткага падаўлення масавых выступленняў супраць фальсіфікацыі выбараў^[5]. Таксама 18 жніўня 2020 года падпісаў адкрыты ліст прадстаўнікоў спартыўнай галіны Рэспублікі Беларусь з патрабаваннем прызнаць несапраўднымі выбары прэзідэнта Рэспублікі Беларусь, якія прайшлі 9 жніўня 2020 года^[6].

З’ехаў за мяжу і далучыўся да Беларускага фонду спартыўнай салідарнасці^[7]. Адказваў за знешнюю палітыку і гандаль у Народным антыкрызісным упраўленні^[8]. У 2021 пры разглядзе партнёрамі НАУ справаздач узнікла пытанне аб недастатковай колькасці дакументаў, якія пацвярджалі выдаткі, у выніку Котаў сышоў з пасады старшыні праўлення^[9]. Каб прымусіць яго знайсці гэтыя дакументы альбо панесці адказнасць НАУ падала на Котава пазоў у суд^[9].

У тым жа 2021 годзе стаў адным з арганізатараў Форума дэмакратычных сіл — разам з Валерыем Цалкалам, Вольгай Карач і іншымі дзеячамі^[10]. У 2024 годзе ў Беларусі быў завочна прысуджаны да 12 гадоў пазбаўлення волі і штрафу памерам 15000 базавых велічынь па справе «Форуму дэмакратычных сіл»^[11].

Працуе ў івэнт-агенцтве Terra Group былога палітвязня Віталя Крыўко, члена колішняга штаба Віктара Бабарыкі^[10].

Знікненне

Перастаў выходзіць на сувязь 21 жніўня 2025 года. Сваім калегам Котаў сказаў, што просіць адгул для камандзіроўкі «па палітыцы», жонцы — што трэба ад'ехаць па працы. Не вярнуўся ў Польшчу самалётам 24 жніўня, як тое было запланавана^[10].