Анатоль Паўлавіч Кудравец

У Вікіпедыі ёсць артыкулы пра іншых людзей з прозвішчам Кудравец.

Анатоль Паўлавіч Кудравец (нар. 1 верасня 1936, в. Аколіца, Клічаўскі раён — 8 мая 2014) — беларускі пісьменнік, перакладчык, кінасцэнарыст.

Анатоль Паўлавіч Кудравец
Асабістыя звесткі
Дата нараджэння	1 верасня 1936(1936-09-01)
Месца нараджэння	Аколіца[d], Каўбчанскі сельсавет, Клічаўскі раён, Беларуская ССР, СССР
Дата смерці	8 мая 2014(2014-05-08) (77 гадоў)
Месца смерці	Мінск, Беларусь
Пахаванне	могілкі Калодзішчы
Грамадзянства	СССР  Беларусь
Альма-матар	Слуцкае педагагічнае вучылішча[d] аддзяленне журналістыкі філалагічнага факультэта БДУ (1963)
Месца працы	Першы Нацыянальны канал Беларускага радыё Літаратура і мастацтва Беларусь Маладосць Мастацкая літаратура Цэнтральны камітэт КПБ Нёман
Прафесійная дзейнасць
Род дзейнасці	пісьменнік, перакладчык, сцэнарыст
Гады творчасці	1960 — 2014
Мова твораў	беларуская
Грамадская дзейнасць
Член у	Саюз пісьменнікаў СССР Саюз беларускіх пісьменнікаў
Прэміі	Залаты апостраф (2012) Дзяржаўная прэмія БССР імя Якуба Коласа (1986)
Узнагароды

Біяграфія

Скончыў Слуцкае педвучылішча (1955), аддзяленне журналістыкі БДУ (1963). Член Саюза пісьменнікаў СССР (1969). Працаваў настаўнікам, рэдактарам на Беларускім радыё, літсупрацоўнікам газеты «Літаратура і мастацтва», рэдактарам выдавецтва «Беларусь», адказным сакратаром часопіса «Маладосць», галоўным рэдактарам выдавецтва «Мастацкая літаратура» (1972—1974), інструктарам, загадчыкам сектара мастацкай літаратуры ЦК КПБ (1974—1978), на працягу 20 гадоў галоўным рэдактарам часопіса «Нёман» (1978—1997).

Творчасць

Друкуецца з 1960 года. Першы зборнік апавяданняў «На зялёнай дарозе» (1968) вызначаецца праўдзівасцю, уменнем убачыць у чалавеку агульназначнае. У аповесці «Раданіца» (1971) ставіць праблему духоўных каштоўнасцей сучасніка, яго жыццёвай пазіцыі, адносін да мінулага і будучага. У кнігах «Дзень перад святам» (1975), «Зімы і вёсны» (1976), «На балоце скрыпелі драчы» (1979), рамане «Сачыненне на вольную тэму» (1984) адлюстраваў складаныя працэсы ў сучаснай вёсцы. Творчасць пісьменніка вылучаецца глыбокім псіхалагізмам, уменнем праз разгортванне падзей перадаць драматызм чалавечых характараў, творы адметныя дакладнасцю апісання жывых рэалій, побыту, прыроды, дзейных асоб. Аўтар кнігі падарожных нарысаў «За чужымі далямі» (1981), сцэнарыяў мастацкіх фільмаў «Асеннія яблыкі» (1975), «Раданіца» (1984, з Ф. Коневым).

Займаўся перакладамі. На беларускую мову пераклаў «Падарожжы Гулівера» Дж. Свіфта, «Сібірскія апавяданні» У. Іванава, раманы А. Нурпеісава «Змрок» і «Нягоды», аповесць К. Сіманава «Дні і ночы», «Аповесці» А. Тамсаарэ, кнігі «Апошні прамень» У. Караленкі, «На Іртышы» С. Залыгіна і інш.

Асноўныя творы

• «На зялёнай дарозе» (1968)
• «Раданіца» (1971)
• «Дзень перад святам» (1975)
• «Зімы і вёсны» (1976)
• «На балоце скрыпелі драчы» (1979)
• «За чужымі далямі» (1981)
• «Сачыненне на вольную тэму» (1985)
• Выбраныя творы ў 2 тамах (1986—1987)
• «Блакітны вярблюд» (1990)
• «Смерць нацыяналіста» (1992)

Прызнанне

• Узнагароджаны ордэнам Дружбы народаў.
• Лаўрэат Дзяржаўнай прэміі імя Якуба Коласа за раман «Сачыненне на вольную тэму» (1986)
• Лаўрэат прэміі «Залаты апостраф» (2012)^[1]

Зноскі

1. Уганараваныя лаўрэаты прэміі «Залаты апостраф» Архівавана 4 мая 2017.