Анатомія

Анато́мія (ад грэч. ἀνα- — ізноў, зверху і τέμνω — «рэжу», «рублю») — зборная група раздзелаў біялогіі, якія займаюцца вывучэннем структуры арганізмаў ці іх частак. Звычайна пад анатоміяй маецца на ўвазе макраскапічная анатомія — вывучэнне структур, якія можна пабачыць простым вокам, без павелічэння. Вывучэннем тканак і клетак з дапамогай павелічэння займаецца мікраскапічная анатомія, яе другая назва — гісталогія^[1].

Галіны

Найбольш вядомыя галіны анатоміі:

• анатомія раслін — вывучае структуры і ўзаемнае распалажэнне тканкавых комплексаў у раслін.
• анатомія жывёл — вывучае структуры і ўзаемнае распалажэнне тканкавых комплексаў у жывёл.
• анатомія чалавека — вывучае структуры і ўзаемнае распалажэнне тканкавых комплексаў у чалавека. Гэтая галіна навукі мае значэнне як для біялогіі, гэтак і для медыцыны. Акрамя таго, веданне анатоміі неабходна ў выяўленчым мастацтве дзеля правільнай перадачы прапорцый, поз, жэстаў і мімікі чалавека.

Самастойнай з’яўляецца параўнальная анатомія жывёл.

Вывучэнне

Традыцыйна анатомія вывучаецца з дапамогай рассячэння целаў^[en]. Дадаткова выкарыстоўваюцца такія метады як агляд загадзя рассечанага цела, пластыкавых мадэлей або камп’ютарных сімуляцый^[2].

Існуюць абсяжны і сістэмны падыходы да вывучэння анатоміі:

• У абсяжным падыходзе кожны абсяг (вобласць) цела (напрыклад, жывот^[en]) вывучаецца асобна ад іншых. Пры гэтым разглядаюцца ўсе структуры і органы, размешчаныя ў гэтым абсягу^[3].
• У сістэмным падыходзе адзінкамі вывучэння з’яўляюцца сістэмы органаў^[en], што могуць распасцірацца праз усё цела (напрыклад, нервовая сістэма)^[4].