Андрэй Уладзіміравіч Любы

Андрэй Уладзіміравіч Любы (нар. 2 студзеня 1980, Мінск) — беларускі гісторык. Спецыяліст па палітычнай гісторыі Вялікага Княства Літоўскага XIV—XVI стагоддзяў і гістарыяграфіі гісторыі Вялікага Княства Літоўскага. Кандыдат гістарычных навук (2006), дацэнт.

Андрэй Уладзіміравіч Любы
Дата нараджэння	2 студзеня 1980(1980-01-02) (45 гадоў)
Месца нараджэння	Мінск, Беларуская ССР, СССР
Жонка	Алёна Любая
Род дзейнасці	гісторык
Месца працы	гістарычны факультэт БДУ БНТУ Беларуская дзяржаўная акадэмія мастацтваў
Навуковая ступень	кандыдат гістарычных навук (2006)
Навуковае званне	дацэнт
Альма-матар	гістарычны факультэт БДУ (2002)

Біяграфія

Нарадзіўся 2 студзеня 1980 года ў Мінску. Вучыўся ў СШ № 83 г. Мінска.

Скончыў у 2002 годзе гістарычны факультэт БДУ. У 2003—2005 гадах навуковы супрацоўнік і выкладчык гістарычнага факультэта БДУ. У 2005 годзе скончыў аспірантуру БДУ. У 2006 годзе абараніў кандыдацкую дысертацыю па тэме «Унутрыпалітычная барацьба ў Вялікім княстве Літоўскім у 30-40-ыя гг. XV ст.»

У 2006—2007 гадах выкладаў у Беларускім нацыянальным тэхнічным універсітэце. У 2007—2010 гадах загадчык кафедры гуманітарных дысцыплін Беларускай дзяржаўнай акадэміі мастацтваў. З 2010 года дацэнт кафедры гісторыі Беларусі Старажытнага часу і Сярэдніх вякоў гістарычнага факультэта БДУ.

Навуковая дзейнасць

Напрамкі даследаванняў: гістарыяграфія гісторыі Беларусі, унутрыпалітычныя канфлікты ў гісторыі Вялікага Княства Літоўскага, эпоха Ягелонаў у гісторыі і гістарыяграфіі дзяржаў Цэнтральнай і Усходняй Еўропы, палітычная культура Вялікага Княства Літоўскага, царкоўная гісторыя.

Навуковыя гранты і стажыроўкі

Удзельнічаў у міжнародных даследчых праграмах Вышаградскага фонда, Фонда імя Юзафа Мяноўскага, Польскага камітэта ЮНЕСКА, Міністэрства адукацыі Літвы, Міністэрства нацыянальнай адукацыі і вышэйшай школы Рэспублікі Польшча. Удзельнік міжнародных гуманітарных школ пры Даследчым цэнтры антычнай традыцыі і Інстытуце «Artes Liberales» Варшаўскага ўніверсітэта.

Сям’я

У шлюбе з гісторыкам Алёнай Любай.

Бібліяграфія

Удзел у калектыўных працах

• Гісторыя Беларусі са старажытных часоў да канца XVIII ст.: вучэбны дапаможнік для 10-га класа ўстаноў агульнай сярэдняй адукацыі з беларускай мовай навучання. Мінск, 2020.
• Гісторыя Беларусі: дапаможнік. У 4 ч. Ч. 1: Ад старажытнасці да сярэдзіны XVI ст. Мінск, 2018.
• Беларускае мастацтва: гісторыя і сучаснасць / III Няфёдаўскія чытанні. Т. 2: Вялікае княства Літоўскае ў гісторыі і культуры Беларусі. Мінск, 2009.

Літаратура

• ЛЮБЫ Андрэй Уладзіміравіч // Сучасныя беларускія даследчыкі гісторыі Вялікага Княства Літоўскага : біябібліяграфічны даведнік / С. П. Марозаў. — Гродна-Каўнас: ЮрСаПрынт, 2022. — 290 с. — ISBN 978-985-7257-57-7, 978-609-96340-1-2.