Аляксандра Паўлаўна Асторына

Аляксандра Паўлаўна Асторына (28 лістапада 1900(1900-11-28), Чалябінск, Арэнбургская губерня — 15 ліпеня 1982(1982-07-15), Брэст) — беларуская актрыса, рэжысёр, заслужаная артыстка Беларускай ССР (1957).

Аляксандра Паўлаўна Асторына
Дата нараджэння	28 лістапада 1900(1900-11-28)
Месца нараджэння	Чалябінск, Чалябінскі павет[d], Арэнбургская губерня, Расійская імперыя
Дата смерці	15 ліпеня 1982(1982-07-15) (81 год)
Месца смерці	Брэст, Брэсцкая вобласць, Беларуская ССР, СССР
Узнагароды

Біяграфія

Нарадзілася ў дваранскай сям’і. У 1917 годзе скончыла музычнае вучылішча Рускага музычнага таварыства. На сцэне дэбютавала ў 1918 годзе ў г. Самара. Працавала ў тэатрах Масквы, Разані, Арэнбурга, Арла, Кастрамы, Ліпецка.

У 1936—1940 гадах — артыстка Варонежскага Маладзёжнага тэатра, дзе яна іграла ролі Кабаніхі («Навальніца» Аляксандр Астроўскі), Хлястова («Гора ад розуму» Аляксандр Грыбаедаў) і іншыя.

З 1949—1973 гг. працавала ў Брэсцкім драматычным тэатры. Сярод роляў: Акуліна, Манефа («Жаніцьба Бальзамiнава», «На ўсякага мудраца даволі прастаты» Аляксандр Астроўскі), Мярчуткіна («Юбілей» Антон Чэхаў), баба Вера («Адна» Самуіл Алешын), Альжбета («Кветка папаратніка» І. Козела), Маці («Брэсцкая крэпасць» К. Губарэвіча) і іншыя. Аляксандра Паўлаўна — характарная актрыса, майстар сцэнічнай дэталі, гратэску і эпізоду.

Як рэжысёр яна паставіла спектаклі: «Тры сястры» Антон Чэхаў (1956), «Позняе каханне» Аляксандр Астроўскі (1963). У 1957 годзе атрымала званне Заслужанай актрысы БССР.

Асторына з’яўлялася адным з арганізатараў Брэсцкага тэатра лялек, на сцэне якога яна таксама ажыццявіла шэраг пастановак: «Іван — сялянскі сын», Б. Сударушкіна (1963), «Балабушка» («Калабок») і «Рэпка» Г. Ландау (1964), «Сакрэтны пакет» В. Паўлава і інш.

Памерла 15 ліпеня 1982 г. у г. Брэсце.

У Беларускім дзяржаўным архіве-музеі літаратуры і мастацтва ў г. Мінску захоўваюцца дакументы творчай дзейнасці Асторынай: афішы і праграмы спектакляў з яе ўдзелам; фатаграфіі актрысы ў ролях і сцэнах са спектакляў, якія яна іграла ў Разанскім савецкім тэатры, Маскоўскім тэатры драмы і камедыі, Кастрамскім гарадскім тэатры, Варонежскім абласным маладзёжным тэатры, у Брэсцкім драмтэатры, а таксама рукапісы Аляксандры Паўлаўны: артыкулы, рэцэнзіі, лекцыя-канцэрт, нататкі і лісты, асабістыя дакументы, дакументы творчай, службовай і грамадскай дзейнасці актрысы.

Літаратура

• Асторына Аляксандра Паўлаўна // Культура Беларусі : энцыклапедыя : Мінск, 2010. Т. 1. С. 295.
• Асторина Александра Павловна // Регионы Беларуси : энциклопедия : в 7 т. Т.1. Брестская область : в 2 кн. Минск, 2009. Кн. 1. С. 28.
• Асторина Александра Павловна // Республика Беларусь : энциклопедия : [в7 т.]. Минск, 2006. Т.2. С.154.
• Асторына Аляксандра Паўлаўна / Р. М. Бакіевіч // Тэатральная энцыклапедыя : у 2 т. Минск, 2002. Т. 1. С. 63.
• Асторына Аляксандра Паўлаўна // Беларуская энцыклапедыя : у 18 т. Мінск, 1996. Т. 2. С. 47.