Бабруйскі краязнаўчы музей

Бабруйскі краязнаўчы музей — адзін з найстарых музеяў у Беларусі. Заснаваны ў 1924 годзе ў Бабруйску.

Бабруйскі краязнаўчы музей
Профіль	Комплексны
Заснаваны	1924
Падпарадкаванасць	аддзел культуры Бабруйскага гарвыканкама
Краіна	Беларусь
Месцазнаходжанне	Магілёўская вобласць, г. Бабруйск, вул. Сацыялістычная, 56, 213826
Памеры фонду	12 462
Агульная плошча	1220
Выставачная плошча	678
Плошча запаснікаў	96,8
Адкрыты	10.00–17.00, акрамя панядзелка і аўторка
bobruisk-museum.com/by/

Гісторыя

Першым дырэктарам стаў Славін Цодзік Якаўлевіч — аматар-краязнаўца, выхадзец Глускай воласці Бабруйскага павета. У адпаведнасці з рашэннем гарадскога кіраўніцтва ў 1924 годзе для музея адвялі невялікі драўляны будынак, які знаходзіўся ў двары дзіцячай бібліятэкі. Ц. Я. Славіну было даручана ўзначаліць працу па стварэнні Бабруйскага краязнаўчага музея. У 1927 годзе ў горадзе праводзілася вялікая экспазіцыя дасягненняў народнай гаспадаркі Бабруйска за гады савецкай улады і вялікая частка экспанатаў з гэтай выставы была падорана музею.

У 1930 годзе, па рашэнні гарвыканкама, музею адводзіцца новы будынак па вуліцы Пушкіна, 145 (гэта быў асабняк, пабудаваны ў 1912 годзе). Былі адкрыты новыя аддзелы: аддзел рэлігіі, прамысловасці і гістарычны аддзел. У гэтым будынку музей працягваў працаваць да пачатку Вялікай Айчыннай вайны. Лёс Ц. Я. Славіна, вялікага энтузіяста музейнай справы, склаўся трагічна. Яго абвінавацілі ў контррэвалюцыйным выступе, у захоўванні контррэвалюцыйных кніг і 6 жніўня 1937 года Славін быў арыштаваны. Цодзік Якаўлевіч загінуў у адным з лагераў ГУЛАГа. Пазней ён быў рэабілітаваны пасмяротна.

З 1 кастрычніка 1996 года музей размяшчаецца ў новым будынку па адрасе вул. Сацыялістычная 56/40.

Экспазіцыя

Агульная плошча музея складае 1343 м², экспазіцыйная — 668,9 м², плошча захоўвання фондаў 95,4 м². У музеі два паверхі. 10 экспазіцыйных залаў, 5 фондавых пакояў, лекцыйная зала на 40 пасадкавых месцаў, бібліятэка, 4 кабінеты супрацоўнікаў, кабінет дырэктара. Дырэктар музея — Арцёмчык Наталля Пятроўна (з 24.09.1987). Аўтар праекта мастацкага афармлення экспазіцыі музея – заслужаны працаўнік культуры Беларусі Эдуард Агуновіч. Удзел у афармленні экспазіцыі прынялі члены Бабруйскай гарадской арганізацыі Беларускага саюза мастакоў: Валер Калтыгін, Юрый Нікіфараў, Анатоль Концуб, Эдуард Белагураў, Алег Савічаў, І. І. Данільчанка, Уладзімір Рубцоў, Сямён Абрамаў. Непасрэднымі выканаўцамі мастацка-афарміцельскіх прац сталі бабруйскія прафесійныя мастакі: У. Н. Гаўрыленка, А. У. Гаўрыленка і інш.

15734 прадметаў асноўнага фонду, 19012 прадметаў навукова–дапаможнага фонду. Асноўны фонд музея складаюць прадметы 28 музейных калекцый: «Археалогія», «Боепрыпасы і часці зброі», «Баністыка», «Вексілалогія», «Ваенная амуніцыя», «Графіка», «Дакументы», «Дэкаратыўна-прыкладнае мастацтва», «Жывапіс», «Кераміка», «Механізмы і дэталі механізмаў», «Нумізматыка», «Адзежа», «Прылады працы і прыстасаванні», «Агнястрэльная зброя», «Друкаваныя выданні», «Прадметы побыту», «Прадметы з утрыманнем каштоўных металаў», «Прыборы і апараты», «Прыродазнаўчая калекцыя», «Скульптура», «Сфрагістыка», «Фалерыстыка», «Фонадакументы» «Фотадакументы», «Халодная зброя», «Шкло», «Іншыя калекцыі».

Літаратура

• Бабруйскі краязнаўчы музей / / Энцыклапедыя гісторыі Беларусі – Мн., 1993. – Т. 1. – С. 257.
• Расказваюць экспанаты: (Бабруйскі краязнаўчы музей) / / Памяць: Гіст.-дакум. хроніка Бабруйска. – Мн., 1995. – С. 738.
• Артемчик Н. П. Из истории Бобруйского краеведческого музея / / Старажытнасці Бабруйшчыны. – Мн. – Бабруйск, 1998. – Вып. 2. – С. 5–9.
• Артемчик Н. Цодик Славин умер. Но его дело в Бобруйске живет: Бобруйс. краевед. музею 70 лет / / Магілёўская праўда. – 1994. – 7 ліп.
• Казак А. За справу бяруцца мастакі / / Магілёўскія ведамасці. – 1995. – 19 снеж. – С. 5.
• Карплюк Н. Краязнаўчы музей на стадыі аднаўлення / / Бабруйскае жыццё. – 1996. – 13 ліп.
• Котловская М. В пятницу музей открывает свою первую экспозицию / / Бобруйский курьер. – 1997. – 24 июня.
• Лістапад С. Краязнаўчы музей рыхтуецца да наваселля / / Бабруйскае жыццё. – 1996. – 7 мая.
• Половикова И. Когда-то и на Бобруйщине жили мамонты / / Могилевская правда. – 1998. – 1 авг.

Спасылкі

• bobruisk-museum.com — афіцыйны сайт