Вышыня 88,5

«Вышыня 88,5» — беларускі агітпрапфільм (іншая назва — «Як гэта будзе»). Выйшаў на экраны 1 мая 1932 года.

Вышыня 88,5
Жанр	нямое кіно
Рэжысёр	Юрый Віктаравіч Тарыч
У галоўных ролях	Уладзімір Уральскі[d]
Кінакампанія	Беларусьфільм
Працягласць	66 хв.
Краіна	СССР
Мова	руская
Год	1932
IMDb	ID 21630100

Сюжэт

Дзеянне фільма разгортваецца ў абстаноўцы магчымай вайны. Раніца ў памежным калгасе Падгай. Самалёт скідае ўлёткі з паведамленнем аб пачатку вайны, аб’яўляецца мабілізацыя. Старшыня калгаса Волкаў арганізуе збор мужчын на прызыўны пункт, здачу збожжа дзяржаве, распараджаецца схаваць жывёлу ў лесе. Членам сельскай ячэйкі Асаавіяхіма^[ru] раздаюць зброю і процівагазы. Камсамольцы-асаавіяхімаўцы расклейваюць на сценах дамоў апусцелай вёскі заклікі да салдат-інтэрвентаў — падманутых пралетарыяў. Ноччу часці Чырвонай Арміі пераходзяць у наступ. Пераследуючы ворага, байцы Н-скай стралковай дывізіі губляюць сувязь з флангамі і тылам і аказваюцца ў акружэнні. Для аднаўлення сувязі штаб корпуса пасылае самалёт, на выручку акружанцам спяшаюцца матарызаваны і кавалерыйскі палкі. Самалёт збіты ворагам. Асаавіяхімаўцы, сведкі паветранага бою, выяўляюць у планшэце загінулага лётчыка^[ru] данясенне камандзіра акружанай дывізіі і карту. Волкаў адпраўляе іх з пастухом Янкам насустрач Чырвонай Арміі. Шкоднікі-кулакі^[ru] з хутара падпальваюць лес. Пакуль Волкаў дапамагае чырвонаармейцам знайсці абыходныя шляхі, калгаснікі арганізуюць абарону пераправаў^[ru]. У гэты час акружаныя часці вядуць цяжкія баі. Месца забітых байцоў займаюць асаавіяхімаўцы. Шкоднік-хутаранін ірве тэлефонны кабель. Янка ўступае з ім у сутычку. Здраднік забіты. Сувязь адноўленая. Кальцо акружэння прарвана. Асаавіяхімаўцы арганізуюць вываз параненых. У пошуках транспартных сродкаў яны выкрываюць другога кулака-шкодніка, які псаваў падводы, скраў і схаваў кулямёт з падбітага самалёта. Камкор дзякуе падгайскай ячэйцы Асаавіяхіма за аказаную дапамогу. Наступ Чырвонай Арміі працягваецца.

У ролях

Акцёр	Роля
Іван Журавін	камдыў
Уладзімір Уральскі[ru]	Паўлаў Паўлаў
Андрэй Апсалон[ru]
Н. Празароўскі

Здымачная група

• аўтары сцэнарыя: Ю. Берман, Б. Вярхоўскі;
• рэжысёр: Юрый Тарыч;
• аператары: Г. Максімаў, Іван Ціхаміраў;
• мастак: Ісаак Махліс.

Цікавыя факты

• Адзін з першых савецкіх фільмаў на абаронную тэматыку.
• У здымках прынялі ўдзел сапраўдныя воінскія злучэнні.

Тэхнічныя даныя

• Чорна-белы, нямы
• 7 частак.

Спасылкі

• «Вышыня 88,5» на сайце «Энциклопедия отечественного кино»