Галіна Орса

Галіна Орса (15 лютага 1930 — 6 красавіка 1984) — беларуская грамадска-культурная дзяячка, педагог. Дачка Аляксандра Орсы і сястра Алы Орса-Рамана.

Галіна Орса
Род дзейнасці	грамадская дзяячка, дзеяч культуры, выхавальніца
Дата нараджэння	15 лютага 1930(1930-02-15)
Месца нараджэння	Нягневічы, гміна Нягневічы, Навагрудскі павет, Навагрудскае ваяводства, Польская Рэспубліка
Дата смерці	6 красавіка 1984(1984-04-06) (54 гады)
Месца смерці	Нью-Ёрк, штат Нью-Ёрк, ЗША
Месца пахавання	Беларускія могілкі ў Іст-Брансуіку
Грамадзянства	Польская Рэспубліка  ЗША
Веравызнанне	БАПЦ
Бацька	Аляксандр Орса
Альма-матар	Беларуская гімназія імя Янкі Купалы
Член у	Арганізацыя беларуска-амерыканскай моладзі[d] Беларуска-амерыканскае задзіночанне Саюз беларуска-амерыканскай моладзі

У Вікіпедыі ёсць артыкулы пра іншых людзей з прозвішчам Орса.

Біяграфія

Нарадзілася 15 лютага 1930 года ў сям’і педагогаў Аляксандра і Наталлі Орсаў у вёсцы Нягневічы гміны Нягневічы Навагрудскага павета Навагрудскага ваяводства ў Польскай Рэспубліцы.

З лета 1944 года разам з бацькоўскай сям’ёй яна апынулася на эміграцыі. У 1949 годзе скончыла Беларускую гімназію імя Я. Купалы ў Віндышбергердорфе ^[1], у тым жа годзе прыехала ў ЗША.

Была актыўнай удзельніцай Арганізацыі беларуска-амерыканскай моладзі і Згуртавання беларускай моладзі ў Нью-Ёрку^[2], спявала ў хоры, танчыла і выступала ў драматычнай групе. Была сябрам Беларуска-Амерыканскага задзіночання і Жаночага згуртавання, актыўнай парафіянкай прыходу БАПЦ Св. Кірылы Тураўскага ў Брукліне. У 1960-х была настаўніцай у беларускай школцы, якая дзейнічала пры гэтай царкве.

Памерла 6 красавіка 1984 года ў Нью-Ёрку. Пахаваная ў Іст-Брансуіку на могілках царквы Жыровіцкай Божай Маці БАПЦ.

Зноскі

1. Максімюк Ян. «Беларуская Гімназія імя Янкі Купалы ў Заходняй Нямеччыне (1945—1950)». — Нью Ёрк-Беласток: Беларускі інстытут навукі і мастацтва, 1994. — ISBN 83-902162-0-5.
2. Запруднік, Я. Дванаццатка… — С. 458.