Гомельхлебапрадукт

ААТ «Гомельхлебапрадукт» — дзяржаўнае зернеперапрацоўчае прадпрыемства ў Гомелі, заснаванае ў 1917 годзе. На 2015 г. уключаў: млынзавод з цэхам для вытворчасці жытняй і пшанічнай мукі, манных крупаў; аўтаматызаваную вытворчасць сутачнай магутнасцю ў 530 тон рассыпных камбікармоў і 220 тон грануляваных камбікармоў; цэх для вытворчасці аўсяных, грэцкіх і ячных круп, гароху, каш і крупяных шматкоў хуткага прыгатавання.

Гомельхлебапрадукт
Тып	Адкрытае акцыянернае таварыства
Заснаванне	1917
Размяшчэнне	Гомель, вул. Мазурава, д. 48
Ключавыя постаці	Генадзь Суздалеў
Галіна	харчовая прамысловасць
Прадукцыя	бліны, вотруб’е, камбікорм, каша, крупа, мука
Абарот	850,419 млрд руб[1] (2014; $82,885 млн)[2]
Аперацыйны прыбытак	29,645 млрд руб ($2,889 млн)
Чысты прыбытак	20,612 млрд руб ($2,009 млн)
Дэвіз	НоваКаша — сіла наша
Матчына кампанія	Гомельскі аблвыканкам
Даччыныя кампаніі	Навабеліцкі камбінат хлебапрадуктаў
Сайт	kolos.by

Гісторыя

На пачатку 1917 года на месцы крупазавода працаваў купецкі млын для вытворчасці шатраванай мукі магутнасцю на 10 тон за суткі. У выніку пераабсталявання 1926—1927 гадоў вытворчасць вырасла да 35 тон за суткі. Суседні млын пераабсталявалі на выпрацоўку аўсянай і ячнай мукі. Тамсама пазней паставілі крупадзёрку для перапрацоўкі грэчкі ў крупы. У 1934 годзе побач пабудавалі млын 3-гатункавага памолу магутнасцю ў 100 тон за суткі з элеватарам ёмістасцю на 8 тыс. тонаў, што зрабіла крупазавод найбольшым у Беларусі. Пасля пераабсталявання 1936—1937 гадоў крупазавод штодня перапрацоўваў па 105 тон аўса (50 т), грэчкі (40 т) і ячменю (15 т). У 1947 годзе пачалі ўзвядзенне жалезабетоннага элеватара з прыбудовай у 1962—1967 гадах трох сіласных карпусоў^[3]. У 1949 годзе прадпрыемства перайшло да перапрацоўкі толькі грэчкі з сутачнай магутнасцю вытворчасці ў 35 тон. У 1958 годзе, пасля давядзення вытворчай магутнасці да 180 тон за суткі, Гомельскі камбінат хлебапрадуктаў (КХП) упершыню ў СССР ужыў гідратэрмічную апрацоўку грэчкі, пры якой пад уздзеяннем цяпла і пары выраблялі хуткаразварвальныя крупы. У 1964 годзе ўвялі ў дзеянне 2-секцыйны млын магутнасцю ў 180 тон пшаніцы і 100 тон жыта за суткі. У 1996 годзе камбінат ператварылі ў Гомельскае вытворчае аб’яднанне хлебапрадуктаў. 31 снежня 1999 года прадпрыемства атрымала сучасную назву — ААТ «Гомельхлебапрадукт», якому падпарадкавалі Рагачоўскае хлебапрыёмнае прадпрыемства. У 2007 годзе далучылі Навабеліцкі КХП. Адначасна пачалі пераабсталяванне крупянога цэха Гомельскага КХП, магутнасць якога перавысіла 38 тыс. т за год, што зрабіла крупазавод найбольшым у Беларусі^[4].

У 2009—2010 гадах на Навабеліцкім КХП збудавалі 2 сушылкі на 17 тыс. тон збожжа. У 2010 годзе да «Гомельхлебапрадукта» далучылі сельскагаспадарчае прадпрыемства «Андрэеўка-Агра» (Буда-Кашалёўскі раён, Гомельская вобласць). На снежань 2011 года «Гомельхлебапрадукт» уключаў: млынзавод для вытворчасці жытняй і пшанічнай мукі, манных крупаў; камбікормавую вытворчасць магутнасцю ў 520 тон за суткі рассыпных камбікармоў з аўтаматызаваным дазаваннем і 220 тон за суткі грануляваных камбікармоў; цэхі для вытворчасці аўсяных, грэцкіх і ячных круп; цэхі для вытворчасці гароху, кашаў хуткага прыгатавання і крупяных шматкоў; жывёлагадоўча-раслінаводчае прадпрыемства «Андрэеўка». У 2011 г. Гомельскі КХП нарыхтаваў 17,5 тыс. тонаў грэчкі. 90 % грэчкі пайшло на ўнутраны рынак. Навабеліцкі КХП перапрацаваў 110 тыс. тонаў збожжа, з якіх 70 тыс. т паступіла пасля збору ўраджаю. У 2011 г. на Навабеліцкім КХП дадаткова пабудавалі 10 сушылак, што павысіла ёмістасць для захоўвання збожжа з 20 тыс. т да 48 тыс. тонаў^[4].

Зноскі

1. Справаздача аб дзейнасці ААТ за 2014 год (руск.)(недаступная спасылка). Міністэрства фінансаў Рэспублікі Беларусь (29 мая 2015). Архівавана з першакрыніцы 9 верасня 2020. Праверана 26 сакавіка 2020.
2. Сярэднеўзважаны курс беларускага рубля ў адносінах да замежных валют на валютным рынку Рэспублікі Беларусь за 2014 год. Нацыянальны банк Рэспублікі Беларусь. 2015. Праверана 28 снежня 2015.
3. Віктар Бойка, Алена Даўжанок. Заўсёды на крок наперадзе // Звязда : газета. — 14 лістапада 2013. — № 214 (27579). — С. 6. — ISSN 1990-763x. Архівавана з першакрыніцы 5 верасня 2014.
4. Віктар Бойка, Алена Даўжанок. Прыбытак — вышэй за ўсё, але галоўнае — якасць // Звязда : газета. — 17 снежня 2011. — № 241 (27105). — С. 6. — ISSN 1990-763x.(недаступная спасылка)