Дафніі

Дафніі, вадзяныя блохі (Daphnia) — род прэснаводных беспазваночных жывёл надатрада галінаставусыя (Cladocera).

Дафніі
Дафнія звычайная (Daphnia pulex)
Навуковая класіфікацыя
прамежныя рангі Дамен:  Эўкарыёты Царства:  Жывёлы Падцарства:  Эўметазоі Без рангу:  Двухбакова-сіметрычныя Без рангу:  Першаснаротыя Без рангу:  Ecdysozoa Без рангу:  Panarthropoda Тып:  Членістаногія Падтып:  Ракападобныя Клас:  Шчэлепаногія Надатрад:  Галінаставусыя Атрад:  Anomopoda Сямейства:  Daphniidae Род:  Дафніі
Міжнародная навуковая назва
Daphnia O. F. Müller, 1785
Падроды
Australodaphnia Ctenodaphnia Daphnia Hyalodaphnia
Сістэматыка на Віківідах Выявы на Вікісховішчы ITIS   83873 NCBI   6668 EOL   46946578 FW   284820

Апісанне

Цела (даўжыня 0,7—6 мм) укрыта празрыстай акругленай двухстворкавай хіцінавай ракавіай, створкі якой злучаныя на спіне. На галаве маецца шчыток з дзюбай і фасетачнае вока, а ў некаторых і наўпліяльнае вока. Вусікі (антэны) — органы пачуцця і перамяшчэння. Грудзі складаюцца з 4—6 сегметнаў, кожны з парай ног.

Пашырэнне

У сусветнай фауне адзначана каля 150 відаў, пашыраны ўсюды, акрамя палярных абласцей. Дафніі жывуць у азёрах, сажалках, часовых вадаёмах, плыткіх затоках рэк; утвараюць значную частку планктону. На Беларусі найбольш трапляюцца дафнія звычайная (Daphnia pulex) і дафнія даўгахвостая (Daphnia longispina).

Асаблівасці біялогіі

Жывяцца бактэрыямі, аднаклетачнымі водарасцямі, прасцейшымі, раслінным дэтрытам.

Раздзельнаполыя. Летнія пакаленні прадстаўлены толькі самкамі, якія размнажаюцца без апладнення (партэнагенетычна); восенню з'яўляюцца і самцы, адбываецца апладненне, самкі адкладаюць 1 або 2 аплодненыя яйцы, пакрытыя тоўстай абалонкай. Гэтыя яйцы зімуюць, вясной з іх развіваюцца самкі.

Служаць кормам рыбам і іх маляўкам, дафній штучна гадуюць на корм рыбам. Дафніі — прамежкавыя гаспадары некаторых чарвей, якія паразітуюць у дарослым стане ў розных пазваночных жывёл, у тым ліку ў хатніх качках.