Дзень незалежнасці Фінляндыі

Дзень незалежнасці Фінляндыі (фінск.: itsenäisyyspäivä) — дзяржаўнае свята Фінляндыі, адзначаецца штогод 6 снежня. Гэты дзень лічыцца нацыянальным днём краіны і днём сцяга. Упершыню Дзень незалежнасці адзначаўся 6 снежня 1917 года — пасля таго, як Фінскі парламент ухваліў Дэкларацыю незалежнасці Фінляндыі праз два дні пасля прыняцця Дэкларацыі незалежнасці Сенатам Свінхувуда. Тады 100 дэпутатаў галасавала «за», 88 — «супраць».

Дзень незалежнасці Фінляндыі
Сцяг Фінляндыі
Тып	дзяржаўнае
Устаноўлена	у гонар Дэкларацыі незалежнасці
Адзначаецца	з 1917
Дата	6 снежня

Дзень незалежнасці ў Фінляндыі носіць урачысты і патрыятычны характар. Святкаванне не суправаджаецца гучнымі карнаваламі, і болей засяроджана на памяці аб гісторыі і ўшанаванні ветэранаў войнаў.

Традыцыі святкавання

Афіцыйныя ўрачыстасці пачынаюцца раніцай (звычайна а 9-й гадзіне) з цырымоніі ўзняцця дзяржаўнага сцяга на ўзгорку Вартавай гары ў Хельсінкі. Сцягі вывешваюцца на ўсіх дзяржаўных будынках і многіх прыватных дамах па ўсёй краіне.

У Хельсінкскім кафедральным саборы праходзіць урачыстае набажэнства з удзелам вышэйшага кіраўніцтва краіны. Важным элементам дня з'яўляецца наведванне вайсковых могілак. Афіцыйныя асобы і простыя грамадзяне ўскладаюць вянкі і кветкі да магіл загінулых салдат, у прыватнасці, на могілках Хіетаніемі ў Хельсінкі. Гэта даніна павагі тым, хто загінуў, абараняючы незалежнасць у Зімняй вайне і Вайне-працягу.

У Дзень незалежнасці па тэлебачанні традыцыйна паказваюць фільм «Невядомы салдат» (фінск.: Tuntematon sotilas), зняты паводле аднайменнага рамана Вяйнё Ліна. Гэтая эпапея пра Другую сусветную вайну стала неад'емнай часткай святочнай праграмы.

Крамы і кандытарскія ўпрыгожваюцца ў колеры дзяржаўнага сцяга (сіні і белы), а ў продажы з'яўляюцца адмысловыя пірожныя з бела-блакітнай глазурай.

Спасылкі

• На Вікісховішчы ёсць медыяфайлы па тэме Дзень незалежнасці Фінляндыі