Маналіт (прадпрыемства)

ААТ «ВЗРД „Маналіт“» (ранейшая назва: Віцебскае вытворчае аб’яднанне «Маналіт») — прадпрыемства электроннай прамысловасці Віцебска, спецыялізуецца на вытворчасці кандэнсатараў і тэрмарэзістараў. Дырэктар: Акіф Джафар аглы Гасымаў, папярэднік — Мікалай Міхайлавіч Дуброўскі. Больш 800 рабочых.

Гісторыя

Рашэнне аб пачатку будаўніцтва завода было прынята ў 1953 годзе. Актыўнае яго будаўніцтва пачалося на забалочаным ускрайку Маркаўшчыны ў 1955 годзе. Праз 27 месяцаў вырас першы вытворчы корпус завода, а 28 лютага 1958 года ўжо была адгружана і здадзена спажыўцам першая партыя прадукцыі. Гэта дата і лічыцца днём нараджэння завода.

Спачатку завод спецыялізаваўся на выпуску толькі керамічных вырабаў. Ён быў першым прадпрыемствам такога профілю не толькі ў Віцебску, а і ў рэспубліцы.

У 1972 годзе завод ужо быў высока механізаваным прадпрыемствам — быў узнагароджаны ордэнам Працоўнага Чырвонага Сцяга.

У 1977 годзе аб’яднанню было прысуджана званне «Віцебскае вытворчае аб’яднанне „Маналіт“ імя 60-годзя Вялікага Кастрычніка».

27 траўня 2023 года Украіна ўвяла санкцыі супраць прадпрыемства^[1]. Паводле звестак Беларускага расследавальніцкага цэнтра, Беларускай службы Радыё «Свабода» і Слідство.Інфо^[uk], завод вырабляе кампаненты для расійскага ваенна-прамысловага комплексу^[2].

Сённяшняе прадпрыемства

На сённяшні дзень ААТ «Маналіт» — вядучы вытворца маналітных керамічных кандэнсатараў.

Асноўная прадукцыя: шматслойныя і аднаслойныя керамічныя і плёначныя кандэнсатары, вырабы з п’езакерамікі і іншыя п’езавырабы, пазістары, шматслойныя індуктыўнасці на керамічнай падложцы для паверхневага мантажу, складанае тэхналагічнае абсталяванне, сістэмы электроннага запальвання, устройствы цеплавой аховы электрарухавікоў, мікрафоны, бытавыя пыласосы і іншыя тавары шырокага ўжытку. На вытворчым аб’яднанні дзейнічае навукова-даследчы інстытут электроннай тэхнікі.

Героі Сацыялістычнай Працы

• Аляксандр Пятровіч Авечкін

Зноскі

1. Украина ввела санкции против 51 человека и 220 юридических лиц. В списке структуры РЖД и 19 белорусских предприятий (руск.). Настоящее Время (27 мая 2023).
2. Витебский завод «Монолит» производит компоненты для российского ВПК – БРЦ (руск.). Reform.news (13 жніўня 2025).