Медаль да стагоддзя БНР

Медаль да стагоддзя БНР — узнагарода Рады Беларускай Народнай Рэспублікі, зацверджаная 23 сакавіка 2018 года. Агулам медалём узнагароджаныя больш за 130 асоб з Беларусі і замежжа.

Медаль да стагоддзя БНР
Краіна	Беларуская Народная Рэспубліка
Тып	медаль
Каму ўручаецца	ваенным і грамадскім дзеячам
Падставы ўзнагароджання	праца на карысць беларушчыны, папулярызацыя яе
Дата заснавання	23 сакавіка 2018
Статус	не ўручаецца
Статыстыка ўзнагароджанняў
Першае	24 снежня 2018
Колькасць	каля 180
Чарговасць узнагарод
Старэйшая	Ордэн Пагоні

Падставы для ўзнагароджання

Згодна са сваім статутам, медаль уручаецца за пажыццёвыя заслугі ў працы дзеля здзяйснення ідэалаў Акта 25 сакавіка 1918 г., у тым ліку за даследаванні і папулярызацыю беларушчыны, здабыццё і ўмацаванне дзяржаўнай незалежнасці Беларусі, барацьбу за свабоду і дэмакратыю ў Беларусі.

Медаль уручаецца:

• Асобам, якія адзначыліся на ніве змагання за волю і незалежнасць Беларусі,
• Выбітным грамадскім і культурніцкім дзеячам у Беларусі і сярод беларускага замежжа,
• Замежнікам, якія спрычыніліся да даследаванняў і папулярызацыі Беларусі ў свеце, а таксама іншым чынам спрыялі нацыянальным інтарэсам Беларусі.

Апісанне

Медаль выраблены з бронзы, мае круглую форму дыяметрам 38,61 мм^[1].

На аверсе выбітыя выява герба «Пагоня», скрыжаваныя дубовыя галінкі і надпіс «Рада Беларускай Народнай Рэспублікі».

Рэверс

На рэверсе выбіты надпіс: «100 гадоў БНР», даты «1918» і «2018», лаўровы вянок і беларускі шасціканцовы крыж.

Стужка медаля складаецца з вертыкальных палосаў наступных колераў і размешчаных у наступным парадку: шырокая белая, вузкая чорная, шырокая чырвоная, вузкая чорная, шырокая белая. Наверсе стужкі замацаваная бронзавая планка з надпісам «B.N.R.» Шырыня стужкі — 34 мм.

Да медаля дадаецца афіцыйны дыплом на беларускай мове або на беларускай і англійскай мовах.

Узнагароджаныя

У. Арлоў узнагароджвае Б. Пятровіча медалём «100 гадоў БНР» ад імя старшыні Рады БНР Івонкі Сурвілы

Агулам узнагароджаныя больш за 130 асоб з Беларусі і замежжа. Сярод іх палітыкі і грамадскія дзеячы; ветэраны беларускага незалежніцкага руху і палітычныя вязні.

Сярод узнагароджаных:^[2]

• Уладзімір Арлоў — беларускі пісьменнік
• Алесь Бяляцкі^[3] — беларускі грамадскі дзеяч, праваабаронца
• Радзім Гарэцкі — акадэмік НАН Беларусі
• Джым Дынглі — брытанскі славіст, даследчык беларускай гісторыі і літаратуры
• Арнольд Макмілін — брытанскі славіст, даследчык беларускай літаратуры
• Адам Мальдзіс — беларускі літаратуразнавец, гісторык, пісьменнік, журналіст
• Аляксей Марачкін — беларускі мастак, сябра аргкамітэта БНФ (1988)
• Алена Міхалюк — беларускі грамадскі дзеяч у Вялікабрытаніі
• Уладзімір Някляеў — беларускі паэт, грамадска-палітычны дзеяч, намінант на Нобелеўскую прэмію
• Наталля Радзіна — беларускі журналіст, рэдактарка Хартыі 97
• Дэвід Суорц — першы пасол ЗША ў Беларусі
• Леў Талбузін — беларускі дызайнер, скульптар
• Юры Туронак^[4] — беларускі гісторык
• Аляксандр Шатэрнік — беларускі скульптар
• Алесь Шут — беларускі хірург, дэпутат Вярхоўнага Савета Беларусі XII склікання, член Партыі БНФ
• Стэфан Эрыксан — пасол Швецыі ў Беларусі

Зноскі

1. МЕДАЛЬ ДА СТАГОДДЗЯ БНР: АПІСАННЕ, Сайт Рады БНР 19 лютага 2019
2. Алексіевіч, Пазьняк, Вольскі, Эрыксан, Белавус. Хто яшчэ ўзнагароджаны мэдалём у гонар БНР-100 (бел. (тар.)) // svaboda.org 23 сакавіка 2019
3. Раней узнагароджвала толькі дзяржава, а цяпер — краіна (нявызн.). Новы Час (30 жніўня 2019). Праверана 31 жніўня 2019.
4. Уручаны першы Медаль да 100-годдзя БНР Архівавана 20 лютага 2019., Радыё Рацыя